O aso malolo ole Kerisimasi ma le Tausaga fou ua mavae atu nei sa tumutumu ai le mamalu ole Itumalo o Siumu faapea malo usu ile faafotu Tupu ole suafa Tofaeono ole afioaga o Siumu. Ole paia lava lea auā le afio o Sa Asomua ma Aiga e lua, e alalatai ai Sa Tuuu ma lau fetalaiga Tuuu. Alalatai ai le Falelua o Tulafale, alalatai ai foi Li‘o ole fofoga ole Alataua, Utaiileuo ma le mamalu ile faletolu.
Ose tasi o suli e faasino ile suafa Tofaeono oloo seei foi ile suafa Tupuola ole afioaga le susuga Lafililo ua faaee iai le Tofaeono. Ole maota i Taumainuumau na faatino ai le faafotu Tupu ma sa molimauina le sologa lelei ole polokalame e ui sa toulu uaga ae na faaalia e nisi ole aiga, o uaga o faamanuiaga ua filifilia se tasi o suli ua tele ana galuega lelei ua fai mo le aiga aemaise ole nuu ma le itumalo.
Ole finagalo ole afioga Tofaeono Lafililo o ia sa galue ile tele o tausaga ile Malo lea sa tautua ile Matagaluega o Tupulaga Talavou a‘o lei tuua Samoa ma lona aiga ma masii atu e faamautu i Aotearoa. “O la‘u tala lava lea e fai pea isi a‘u fanau, vaai outou pe tatou te nonofo i fafo ia aua ne‘i galo ia susue pea le faamalama ma vaavaai i lo tatou aiga ma le nuu auā na tatou malaga mai i nei atunuu ole saili o manuia, o lea la ua iu tou aoga ma ua maua galuega ia tautuana lo tatou aiga, le nuu ma le atunuu”.
Ua silasila mamao le afioga ile Nofo ile suafa Tofaeono o Siumu pe a tusa ai ma le finagalo ole Atua pe a umi pea lona soifua, ole a toe foi mai i Samoa e faaaogā pea ona tomai sa tautua ai ile Malo ma lona nuu aemaise o lona aiga.
Na molimauina i saunoaga a tamalii ma failauga ole itumalo ma le nuu le tausaafia ole afioga Tofaeono i lana tautua ona e lē gata sa tautua lelei a‘o lei masii i Niu Sila ma lona aiga, ae a finagalo le nuu ma le itumalo i lana fesoasoani ise atinae, e lē mafai ona solomuli e aapa mai lava e fesoasoani. Ia manuia lou tulai mai lau afioga ile tausiga ole aiga, nuu le itumalo ma le ekalesia.
