“Tautuanā ma outou suafa ole tatou nuu ma le aiga ia pale i tou ulu ma teu ile va o lou fatu ma lou māmā” …Misa Gaga’e
Ua avea le Aso Gafua le aso malolo ole Eseta i Samoa ma aso ua faamauina e le paia ole aiga Lupematasila ile fuaifale o Tuao ile afioaga o Sama’i i Falelatai ose aso na faafotu Tupu ma faafotu ai le vaaulu i nisi o suli ole aiga. Ua faaee ai suafa Lupematasila ose tamalii ma le suafa Ailao ole tulafale.
O le afioga ile Sa’o ole aiga le afioga ile Faaaloaloga Lupematasila Faamanu Ivara na ia momoli nofo e silia ile valusefulu i luma ole paia ole Aiga Tauaana mo le faapaiaina. O tu ma aga masani a Samoa pe a faatino ni faanofonofo ole usu a lele ale afioaga aemaise o Malo usu ma o latou ava tugase e auai e faamamalu ile faaeeina o suafa matai.
O vaaiga ia sa iai le taeao ole Aso Gafua ile amataga o lenei vaiaso fou ma lenei masina fou o Aperila ile afioaga o Sama’i i Falelatai.
O susuga i faafeagaiga ole ekalesia EFKS le susuga ile Toeaina Tautiaga Senara ma le Fesoasoani ole ekalesia Katoliko ua lē maua lona suafa, na ta’ita’i ile sauniga lotu. Ina ua mae’a lea vaega ona alo ai loa le paia o Aiga ile folafolaga o ‘ava ole usu faaaloalo ma ‘ava o nofo, sosoo ai le faatau ma tasi ai e saunoa le afioga ile Faaaloaloga Misa Gaga’e e faapaia nofo ole suafa Lupematasila ma le Ailao.
O upu faufautua ale Faaaloaloga ia i latou ua pale i suafa ole nuu ma le aiga, e tatau le tautua i meafai, i faalavelave aemaise ole lotu. Ole toatele o nofo fou e ‘ai tau malele o nisi e alaala i fafo ma ole fautuaga ia i latou, ia alolofa i tagata ole aiga ma le nuu.
O faaaloaloga masani o tupe ma Ie ole Malo na faaaloalo ai ile paia ole nuu ma le itumalo aemaise o malo usu. E faapena foi faaaloaloga a nofo fou i faafeagaiga na feagai ma le sauniga lotu.
O teutusi e tai afe lima selau ma Ie tetele. O suiga ua iai faanofonofo ile atunuu ua na’o tupe ma toga, ae ua titina isi tupe alu ma le tele o tapenaga ile sauniga o taumafa ma palapala malo sa masani ona faia ai faaaloaloga i tausaga e tele ua mavae.
Ua sili atu ona faigofie le faiga ua iai nei nai lo aso e tele ua mavae.
