Ua faamanavaina e le Atua galuega ale afioga ile Sui ole Fono a Sui Tofia, le afioga ia Tuiloma Pule Lameko, ile itula e 9.30 ile po ole Aso Sa, ile maota gasegase i Motootua.
E tusia lenei lipoti e lei faamatuuina mai se faasilasilaga aloaia mai le Malo e tusa ai ole tuumalo ole afioga ile Sui ole Fono a Sui Tofia.
Ole afioga ia Tuiloma Lameko ua vela lana tautua mo Samoa, e lē gata o totonu o matagaluega ale Malo, ae o tausaga e tele sa tautua ai ose Faipule ole Palemene, ae lei tofia e avea ma Sui Ao.
O ia ose alii suetusi (accountant) ma na uluai tofia e avea ma Pule Sili ole Kamupani vaa a Samoa, le Samoa Shipping Sevices, a’o lei ulufale atu ile Palemene ile tausaga 1979, na avea ai o ia ma Faipule ole itumalo o Safata i lona suafa matai o Pule.
Ole tausaga e 2001 na tauva ai ose Faipule ile Itumalo o Falealili i lona suafa Tuiloma, ma na ia umia ai le isi tofi Faipule ole itumalo o Falealili. Na tofia o ia avea ma Minisita o Tupe Maua i lalo ole faigamalo ale afioga ia Tofilau Eti Alesana, sa tofia foi o ia e avea ma Komesina o tagata faigaluega ale Malo.
Sa aifilofilo foi ile Iuni Lakapi a Samoa i lona tofiga ole Peresetene ole Iuni Lakapi.
Ole masina o Ianuari ile tausaga e 2017, na tofia ai o ia e avea ma Sui ole Nofoa o Sui Tofia, faatasi ma le afioga ia Le Mamea Ropati, ose tofiga ua leva ona tauave toatasi e le afioga ia Tuimalealiifano Vaaleto’a, a’o avea le afioga ile Tuiatua ia Tupua Tamasese Efi ma Ao ole Malo.
Ina ua mae’a le 6 tausaga ole afioga ile Tuiatua ile tofiga Ao ole Malo, na tofia ai le afioga ia Tuimalealiifano Vaaleto’a ile tofiga Ao ole Malo, ae tumau ai pea le avea o Tuiloma ma Le Mamea Ropati ma Sui ole Fono a Sui Tofia. E tuumalo nei le afioga ia Tuiloma ua atoa le 82 tausaga o lona soifua. E lei faalauaiteleina mai e le Malo ni polokalame faale-Malo mo le tuumalo o lana afioga ile Sui Ao, ae iai le talitonuga, o aso malolo ole Eseta, na tuai ai ona faalauiloa aloaia mai e le Malo le tuumalo ole afioga ia Tuiloma.
Ose aso faanoanoa mo le afioaga o Sapunaoa, faapea le itumalo o Falealili, ona ua toesea se tasi o poutu toa sa saili iai le tofa, le uta ma le moe ale itumalo.
Ose tamalii foi ua telē lona sao mo le itumalo aemaise o lona aiga.
