O Samoa le isi atunuu ua faamauina nei le toatele o tagata ua amata ona lē aogā i ai togafitiga e maua mai i fualaau ona o le soona faaaogā o ia togafitiga.
O fualaau tui ma fualaau o meatiga ua tele ina tapa i ai le toatele i taimi e maua ai i gasegase. O le faafitauli tele ua molimauina foi le lē tausisi o gasegase i taimi e tatau ona inu ai ia fualaau ma ua tele lava ina agai i faletalavai ua aumai ai fualaau ae e lē o talafeagai ia fualaau ma le gasegase o maua ai.
O le mau a fomai ma tausi soifua ua oo nei ina toatele ua fiu e toe inu atu fualaau nei ae ua foliga mai ua masani ai le tino ma ua lē o toe mafai e ia fualaau ona tape siama auā ua masani i fualaau nei. O le vaiaso atoa ua tea na ave ai loa le faatāua i le faalauiloa ai o le leaga o le soona faaaogā faalētatau o nei togafitiga faafomai.
O aoaoga na faagasolo i afioaga eseese i Upolu ma Savaii ma polokalame ua ave i luga o televise ma leitio lea na unai ai lenei feau tāua ma ua lapatai mai ai nisi o fomai ma nisi o i latou e ana faletalavai i le leaga o le soona faaaogā o fualaau.
O lea ua faamamalu lava foi le tulaga lea a aunoa ma se talavai e aumai i se fomai poo falemai i itu eseese o le atunuu, e lē o toe mafai lava ona soona tuu atu e faletalavai ni fualaau i le atunuu auā o le faiga sa sau ai na mafai lava ona agai soo se tasi i faletalavai ma talosagaina ai fualaau tui ma o le mafuaaga lea o le faamalosia o lea faiga i lenei vaitaimi.
Ua na o fualaau o le flu ma meatiga o loo mafai ona faatau sa‘o mai i le faletalavai ae o fualaau tui ua matuā lē mafai lava ona faatau sa‘o atu i le faletalavai e aunoa ma se talavai mai i le falemai faapea ai ma fomai tumaoti.
Faaaogā with Love, o le autu lea o le vaiaso na faalauiloa ai lenei taumafaiga a le Soifua Maloloina e pei ona tutu faatasi ai ma fomai tumaoti ma faletalavai i le atunuu.
O le faatāua ina ia umi ona aogā fualaau nei ae lē o le tau saili o nisi vailaau mo le togafitia o le toatele ua lē o toe mafai e fualaau o loo maua i Samoa ona tatali atu siama sa mafai ona faatamaia e fualaau o loo maua i Samoa nei.
