Ole aso malolo tonu ole Eseta a’o fai malologa ai le atunuu mai aoga ma galuega masani ole vaiaso ae e lei malolo ai le faalapotopotoga ole 1Touch Ministry ma le Nobesity Samoa ile faatautaia ai lea ose tasi o polokalame ile Afioga o Lepa ma Saleapaga e faatāua ai le tetee atu ile gasegase ole suka (diabetes).
Ole polokalame faalauiloa lenei ale 1Touch Ministry na amata mai ile masina na tea nei e faalauiloa ai le tetee atu ile ma’i suka ua tele tagata Samoa ua maliliu ai, lea foi na maua le avanoa e Savalia ai le Afioaga o Saleapaga ae faaiu ai ile Afioaga o Lepa. Na auai ai nisi o faafeagaiga o lea Afioaga ma le toatele o tamā ma tina matutua faapea le fanau laiti e molimauina polokalame faamalositino na mafai ona taulamua ai se tasi o sui tuai ole Manu Samoa le Afioga ia Muliagatele Brian Lima. Na auai foi le Afioga ile Minisita o Fesootaiga le Afioga ia Afamasaga Rico Tupa’i ma le toatele o nisi o i latou na malaga mamao atu i Apia e lagolago ai lenei faamoemoe. Ole Amepasa ole Malo o Amerika i Samoa le susuga ia Tony Greubel ma lona faletua sa filofilo faatasi ai i lea aso ma le faamoemoe ole alii amepasa e unaia ai le soifua maloloina i totonu o Samoa. Na taualuga le polokalame o lea aso ile tufatufa ai lea oni faailoga o meataalo mo nisi o i latou na auai ai i lea aso.
Na vaaia foliga fiafia o nisi o tamā ma tina matutua aemaise foi ole fanau ua mafai ona faamalositino faatasi i lea aso, talanoa mai se tasi o tina matua, e faafetaia ai le avanoa ua maua e lē gata ile faia ai o faamalositino ae ua faalogologo foi ise feau tāua na momoli ai e le susuga ile faafeagaia ia Pastor Lenny Solomona e faatatau lea ile tāua tele ole taumafa i meaai paleni mo le soifua maloloina. Na molimau foi se tasi o tamā mai ile Afioaga o Lepa, ole a amata atu i lenei aso ona faia pea ana faamalositino i aso uma ona ole tele o nisi o gasegase o afaina ai lona soifua i aso uma.
Ole feau tāua lenei oloo tala’i pea e le faalapotopotoga lenei ole 1Touch Ministry ma le Nobesity Samoa talu mai ona tatala ai ona faitotoa i Samoa ile tausaga e 2014. Ole faamalosia lea o tagatānuu o Samoa ile tāua tele ole soifua maloloina. E toatele nisi ole mamalu ole atunuu na maua ai ile tino puta ma aafia ai i gasegase lē pipisi e pei ole suka ma le toto maualuga, peitai ole latou molimau ola ile suiga o latou olaga ina ua auai ai ile Misiona ale 1Touch Ministry lea e alu faatasi lava le faatāua ole Itu faaleagaga ma le soifua maloloina. Ta’ua e Pastor Lenny Solomona, ole latou misiona lea mo Samoa ina ia maua se Samoa e soifua maloloina ona tagata ile lumanai, ma e lē gata ile faatautaia ai ole polokalame lenei i Apia ae o lenei foi ua maua ai le avanoa e tala’i atu ai lenei talalelei mo le Afioga o Lepa ma Saleapaga.
Ma oloo iai lava le naunautaiga ole faafeagaiga ina ia faalauaitele ai lenei misiona i nisi vaega ole atunuu o moomia ai le fesoasoani e ala ile faia ai o aoaoga faalesoifua maloloina ae faapea ai foi le faataunuuina ai o faamalositino eseese e mafai ona faatino uma e tagata matutua seia oo lava ile fanau laiti. Ole faalapotopotoga lenei ole 1Touch Ministry e faatautaia ai a latou polokalame o faamalositino ma toleniga i afiafi taitasi ile malae i Tuanaimato.
