Ole afioaga o Sasina ua mae’a ona osi feagaiga ma se alii faipisinisi i Amerika mo le lisiina o se vaega tele o eleele ole afioaga e faatū ai ni pisinisi e pei ose faletalimalo. Ole lisi lea ma le susuga Jesse James o Hawaii oloo tali ai e aiga ole nuu se faamanuiaga o tupe i tausaga taitasi.
E ese lea feagaiga ma le feagaiga ua osia foi e Sasina ma se faipisinisi i Hong Kong mo le lisiina o eleele ole nuu mo le umi e selau tausaga e faato’a ile laau ole nonu lea oloo la’u i fafo mo le gaosia ai o vaiinu faanatura. Ole Aso Faraile ua mavae 6 o Aperila 2018 na tauaao ai e Sasina le $250,000 (lua selau limasefulu afe) ole lisi o lenei tausaga.
Na faaalia e le susuga Leasi Vainuupo Nuusa ose matai sinia ole nuu e tasi lava le auga ole feagaiga e lisi eleele e toto ai le nonu, ia maua e aiga ole afioaga ni faamanuiaga tau seleni e fesoasoani ile atina’e o aiga, aemaise ole tautuaina o ekalesia i totonu o Sasina.
O aiaiga ole lisi na faaalia e Leasi oloo maumau ona fausaga ma tausisia aiaiga o tulafono ile lisiina o fanua Samoa, e lē mafai e le faipisinisi mai fafo ua latou fai paaga ona faatau le eleele ua lisi mo le selau tausaga. E oo foi ile ave ole fanua e mokesi ai se nonogatupe ale faipisinisi i se faletupe e lē o mafai ona faatinoina i lalo ole feagaiga ole lisi.
“Ole matou aiaiga maumaututu lava lena na faia ma investors nei e lē mafai ona mokesi ni nonogatupe i fanua nei”, ole finagalo lea ole faipule o Gagaifomauga Naumera 3 e aofia ai le nuu o Sasina le susuga Laaulialemalietoa Lueatea Polataivao Schmidt ina ua fesiligia ile tulaga ile mokesi.
Na faaalia e le faipule e faia nei suiga ole tulafono ole lisiina o fanua tau Samoa mo ni pisinisi ua leva ona taoto le latou feagaiga ma faipisinisi mai fafo e lē mafai ai ona mokesi fanua o Sasina ini aitalafu mai faletupe.
Ole luaselau limasefulu afe tala ole lisi na tala i tua ma momoli atu ile Maota Samoa i Vaitele na faia ai le feiloaiga a matai o Sasina ma le faipule ole itumalo. Na tufa ai le ta’i $4,000 mo faafeagaiga e to’aono ole nuu ma alu ai le $24,000.
Na toe fao pusa uma le seleni mo le auina atu i Savaii e tufatufa ai i aiga. Na faaaloalo ai foi le faipule ma le nuu i tusitala na auai i teutusi eena laiti ua fafao iai le ta’i selau tala mo latou pasese.
