E le oni tagata Saina e ana le faleoloa muamua ile nuu o Afega pei ona toso ai le tala mai le amataga, ole faleoloa Saina.
Na faatoa iloa ane ele toatele ile aso na tatala aloaia ai le faleoloa, ma auai le Susuga ile Faafeagaiga ia Reverend Foma’i Lafaialii ma le faletua ia Rasela, o lo la alo teine le tamaitai o Fogaa ma lona toalua ia Muliaga e ana le faleoloa. Ua faaipoipo Fogaa ise matai Samoa ose alii Saina ua tagatanuu Samoa. E talavou le ulugalii lenei, ae ua fa o la faleoloa tetele ile atunuu.
Ole tasi i Vaitele uta, tasi i Papauta, tasi i Vailoa Faleata ma le tasi lea ua tatala nei i Afega.
Na talanoa ai le faletua ia Fogaa, “ole lona fā ai lea o faleoloa, ona ole naunau lava e faamalieina lea foi tautua ile tatou atunuu, ae ose aogā ile faatupuina o avanoa faigaluega mo tatou tagata.”
Ma faapena ona avatu iai le lagolago a lona toalua, le afioga a Muliaga Wilson. E tusa ma le to’a 20 ua manuia ai i galuega ile faleoloa fou lea i Afega.
O sāsā ma fiafia e sami ai le faleoloa muamua i talafaasolopito o augatupulaga o aso nei ile afioaga o Afega, na matuā iloga lava ona lagolagoina ele nuu ile Aso Faraile atoa ole vaiaso na tea nei. Mai le taeao, ae oo ifo lava ile afiafi o fai lava faiga siva ma faaauau le tunu vilivili ole latou manu, ma malomaloa ai lava le faili ae sisiva le aufaifaatoaga, o tina ma tamā e oo i tupulaga laiti, ole a o latou manatua pea lea aso faapitoa i talafaasolopito ole latou nuu.
O gasesega uma ma le taunuuga ole faamoemoe ua matagofie na saga faafetaia ai ele Susuga ile faafeagaiga Reverend Foma’i Lafaialii ma le faletua ia Rasela, le lagolago ale afioaga, ae ole komiti o atina’e i totonu ole nuu.
“Faafetai mo mea uma lava, ose fanau ia te au faapena foi ile aiga sa Gaufaleai. Ia alofa le Atua e faamanuia ile atina’e, ma manuia ai le afioaga.” Na faai’u le lauga faafetai ma le faamalo, ma le agaga faagaeetia o mātua, ile tuuina atu lea ole $1,500 le meaalofa tupe mo le afioaga.
Faapaaga ale Best Value ma Afega
Ole a matuā malupuipuia lava le faleoloa lenei ile matou nuu, auā ole a galulue faatasi ma le afioaga. Na talanoa le teutupe ole komiti o atina’e a Afega, le Susuga Maulolo Tavita, “O mea uma lava tau ile saogalemu ma le faafaigaluegaina o tagata e fesili atu ile afioaga.
Ose faapaaga uigaese foi lenei, auā o lea ua ta’i ‘afa’afa latou ile maketi ale aufaifaataoaga a Afega, ‘afa ua faatau ai fua o faatoaga a Samoa, ae ole isi ‘afa ua faatau ai fua o faaeleeleaga mai fafo, pei ona talanoa Maulolo.
Ma le maliega, e totogi le latou lisi, faaaogā tagata ole afioaga i galuega fai, pei ona manuia ai le tusa ole 20, e aofia ai ma leoleopo.
Ole maketi lea ole poloketi ale nuu, e maua ai tupe mo ana atina’e fai e pei o lona faleaoga, oloo fau lava ia latou lava tupe. Ae ole maketi lea na aumai ai le $230 afe ia Iapani, ma le $380 afe a Afega e fau ai.
Ole faapaaga ua tatala aloaia ai nei, ile va ole afioaga o Afega ma le ulugalii talavou Samoa, ole alii ole Saina ua matai Samoa, ae o lona faletua ole tamaitai mai Savaii, ma le faamoemoe ia siitia ma soifua tutusa uma tagata Samoa. Peitai na ‘ata Maulolo ma toe faamanatu mai e faasā taputapu se aitalafu.
O aitalafu ia ma le manatu alofa ole Samoa, ma lana fai faalavelave, ua faapea mai ai foi le SBEC , e le ose agaifanua a Samoa le faifaleoloa, ae ole aganuu a Saina.
