Ua saunoa le Minisita ole Polenisia le afioga Lautafi Fio Selafi Purcell ole Polenisia ole meatotino ale Malo ma o tupe maua ale kamupani vaalele o meatotino foi ale Malo. Na faia lea saunoaga ale Minisita ina ua faatalanoa e tusitala ile aso Toonai ua mavae ao faatali le taunuu ole vaalele fou 737-800 ole Samoa Airways.
Na tuusa’o se fesili ale tusitala o lenei nusipea ile taitaifono ole Komiti Faafoe ole Polenisia le afioga Feesago George Fepuleai sa auai ma le Minisita ile faatalanoaga pe fia se tupe ua amata ai le kamupani vaalele ale atunuu le Samoa Airways ae sa le mafai ele taitaifono ona ia faailoa ni fuainumela.
O lana saunoaga sei tuu atu se avanoa e amata ai le kamupani vaalele.
Na toe faailoa ile taitaifono ole mafuaaga ole fesili ona o soo se pisinisi lava e amata e iai le tupe faavae, peitai sa augata Feesago e tali mai. Na fesiligia foi pe fia le tupe oloo alu ile lisiina mai ole vaalele, ae e lei faailoaina foi.
Ole Aso Lua o lenei vaiaso ua amata ai malaga ale Samoa Airways mai Apia i Aukilani faapea ana malaga e lua ile vaiaso mai Apia i Sini Ausetalia.
E tasi le vaalele ole a faia lenei tautua e pei ona sa iai le tautua ale Polenisia ile sefulu tausaga ua mavae ao lei fai paaga ma le Virgin a Ausetalia lea ua faamutaina ile amataga o lenei vaiaso le faiga paaga ma ua tatala ai ma le faaipoipoga.
Faaalia e Lautafi le Minisita ole Polenisia o soo se taumafaiga lava tau pisinisi e pei ole kamupani vaalele e amata ile tasi le vaa ona faasolosolo atu ai lava lea ina lua, tolu, fa, lima pe ono foi vaalele.
Ole itu mautinoa e fua lea tulaga e tusa ole finagalo ole Minisita pe a lelei ona faagaioi le Samoa Airways.
Ua ta’utino le afioga ile Palemia ile feiloaiga ma tusitala ile vaiaso ua mavae o faaletonu sa feagai ma le Polenisia ile itu tau tupe lea na mafua ai ona gaugau, ona ole faiga sa fai ole aitalafu o pasese ae le toe totogia.
Saunoa le Palemia o lea faaletonu na aafia ai aulotu ma latou faifeau ini malaga e alu i fafo e pei o Niu Sila. Sa fai foi e tagata ole Malo, e pei ona faaalia ele Palemia.
O lea tulaga sa faia muamua e le toe faaluaina ile kamupani vaalele faavaomalo ua toe amatalia.
Ole taimi nei o tupe mama ale Polenisia ua faagaioia ai le Samoa Airways e pei ona faaalia ele taitaifono ole komiti faafoe ae ose taimi oi luma ona tuuina atu lea o se fesoasoani ale Malo pe a tusa ai. Oloo silasila foi ile lumanai ole kamupani vaalele ile faaono faatau atu oni sea i tua ae mo le taimi nei ua na ole Malo oloo faagaioia e ala mai ile Polenisia.
Ole aufaigaluega mai le Iceland Air oloo tautuaina le auaunaga mo pasese malaga i luga ole vaalele ae ua iai ma tagata Samoa.
E ono masina ole a faaaogā ai tagata ole Iceland Air ona ole feagaiga lea ile lisiina mai ole vaalele.
Ole tulaga foi lea i pailate ae ole a suia uma le au faigaluega pe a maea le ono masina.
