E ui ole tele o tupe a Iapani, tusa ma le $43miliona tala Samoa, ua fau ai tanevai ma faamamā, peitai e lē o mafai ona maua e aiga o nonofo lalata iai ole pitonuu o Falemauga lea faamanuiaga. O Falemauga e tuaoi ma Tapatapao, ae oloo tutū tonu lava faatanoavai fou nei na umasa ile vaiaso talu ai, ile tuaoi o Falemauga ma Tapatapao.
Peitai ole fuafuaina ma tapenaga o lenei poloketi, na amata mai lava ile tausaga e 2011, ma faamauina faamealofa ile tausaga e 2014.
Saunoa le sui ole malo o Iapani i Samoa, Tuimaugaoalii Kazumasa Shibuta, ole poloketi lenei e saga faaleleia ai nofoaga oloo tapue ai le suavai, o ogapaipa o feuia‘i ai, o laina faataatitia e tufatufa atu ai le suavai, ma le faapipiiina o mitavai lea ua faamatuu atu ile pulega ole suavai latou te faatautaia.
O fesoasoani a Iapani ia Samoa, e faamealofa, ae lē oni aitalafu e pei ona faamanino mai ele alii amepasa. Na faamauina ele ofisa o Iapani i Samoa, le JICA, ma le vaega suesue ale pulega ole Suavai a Samoa, nisi o faaletonu tau ile suavai i Apia.
E aofia ai i nei faaletonu, suavai e lē o saogalemu pe a oo ina tetele timuga, ole tele o avanoa e afaina ai soifua o tagata mai vai palapalā faatasi ai ma le alu o suavai ma‘umau mai paipa liki (leaks).
Ae ole poloketi lenei e aofia ai tane ma masini e faamamā ai suavai maua i faatanoa i Tapatapao, Vailima, Vaivase uta ma Alaoa pei ona umusa ai ia galuega ile Aso Faraile talu ai ma faamanuiaina ai le tusa ole 45 afe tagata i na vaiaai.
O ia atinae o faatanoavai, e manatu le amepasa o Iapani, e fesoasoani tele ile pulega ole Suavai a Samoa, SWA i aso uma ina ia iloga ai ona faaleleia atoatoa le maua o suavai.
Ole poloketi ose tasi lea o fesoasoani oloo faatupe e Iapani, ma faaauau ai pea mo le 40 tausaga i Samoa.
Pei ona fai ma faamanatu isi galuega tetele na faatupe e Iapani. E aofia ai le Uafu i Apia, Uafu i Mulifanua, Uafu i Salelologa, ole malaevaalele oloo iai ile taimi nei i Faleolo, ole vaa la‘upasese ile va o Upolu ma Savaii le Lady Samoa II, Lady Naomi oloo fealuai ile va ma Amerika Samoa, Lady Samoa III, vaa toso vaa, ole Iunivesite aoao o Samoa, ma isi.
Talu mai ona amata lenei faigapaaga a Samoa ma Iapani, ua faitau $760miliona tala na faatupe ai e Iapani le atinaeina o Samoa mo le agai i luma.
Ina ia faamanino le tulaga na aumai ai nei fesoasoani ia Samoa e Iapani, na saunoa lona Amepasa, e tāua tele ona iloa ele aufaasalalau le ituaiga o avanoa ma auala ua faaauala mai ai nei galuega atinae.
E lua auala, ole faamealofa ma le faaaitalafu, oloo faaui mai ai tupe mo galuega ile tatou atunuu. Ole faamoemoe maualuga foi ole Amepasa, ina ia avea ai lenei poloketi ma auala e maua ai e tagata o Samoa le suavai mamā atoatoa, ma saga faatumauina ai le faigapaaga a Samoa ma lona atunuu.
Ua tuuina atu foi le vaaiga o ia tanevai ose galuega faaauau pea ale Pulega ole Suavai a Samoa, SWA. Ae mo le taimi nei, e lē o iloa se taimi e oo atu ni paipa i Falemauga.
