Ose matatia, ae ose talafaasolopito foi lea i tusigaigoa i Aukilnai ua faatuina ai nei e ni aiga se toafā, ole mafutaga a Tafagamanu Lefaga i Aukilani, se sailiga seleni maoa‘e, e tali ai le manaoga ole susuga ile tausi matagaluega ia Livigisitone Peseta ma le faletua ia Luana Peseta ma le matagaluega mai Samoa ile fia maua lea ose fesoasoani i alo ma tamafanau ole ekalesia oloo i Niu Sila auā le fausiaina ole maota ole susuga ile faafeagaiga.
Ua lē aapa nei aiga ole mafutaga ile toatele ole afioaga oloo auamau i Niu Sila, ae ua fai ile fatu ma le loto ole Isaraelu moni e susue lona faamalama ma autilotilo i lona tupuaga ma lona faasinomaga, aemaise ai ole nofoaga sa faaafailele ai lona soifua faaleagaga a‘o laititi ma talavou.
O aiga e toafā o lenei mafutaga a Tafagamanu i Aukilani oloo aofia ai le afioga ia Leaupepe Tofilau Latu Leaupepe, Matualoto Tupuola Faafili, Fata Luapene Fata ma Laulu Aliimau Livigisitone Peseta. Ole faatagisia mai ole susuga ile faafeagaiga i Samoa ise fesoasoani, na saili ai nei aiga i Aukilani ile faia oni tusi valaaulia, ma tufa atu i uo ma ē masani e faatasigisia ai le aao foai mo le latou faamoemoe.
E fā vaiaso na saili ma tapenapena ai nei aiga ile faia o latou tusi valaaulia ae ole Aso Toonai ua mavae, 22 o Oketopa na faamaopoopo ai loa lea tusi aisi ile hall ale Ekalesia Metotisi i Otahuhu. E maeu le alofa ma le agalelei ole Atua ile tagata e saili punouai ma le faamaoni mo le galuega ale Atua, auā fai mai le tusi e lē se mea faaleaoga lou tautiga ile Atua ma lana galuega.
Na maitauina le taupati atu o aiga, uo ma ē masani i lenei faamoemoe, ae lē gata i lea ole faamaloulou atu ole susuga ile Sea ole faasinoti a Aukilani Matu ia Oianatai Matale faapea Susuga i Faafeagaiga ma o latou faletua o faasinoti e lua ale Metotisi e apogi le faatalauula mai ole matagaluega i Samoa.
Ole susuga lava ile alii Sea ia Oianatai na taitaiina le faamoemoe ile tatalo, ma o ia foi sa tatalaina ipu alofa i lea taeao, ae ole tofa ia Matualoto Tupuola Faafili sa fai ma fofoga ole aso. Sa tatala le avanoa ile mamalu o uo ma aiga sa auai, poo ai lava ua mu lona loto e fia faia sana siva e fesoasoani ai ile faamoemoe.
Ole tausi matagaluega mai Samoa ia Livigisitone Peseta sa ia taualugaina le faamoemoe ole mafutaga. Ae ole maualuga ma le matagofie ole sailiga seleni o faafiafiaga eseese sa iai e pei ole tatau Dance Group ma le La o Samoa Dance Group sa faafiafia a‘o alo le mamalu ole auvalaaulia ile taumafataga.
E $23,290.10 NZ le aao mafola ole mamalu ole auvalaaulia sa foaiina, ma ose tupe na faateia ai nei aiga e toafā ile telē ole seleni ua latou ausia. Ma e viia ai lava le alofa ole Atua i lenei foai ua tusia mo le fausiaina ole maota ole galuega i Samoa i Tafagamanu Lefaga.
E momoli ai le agaga faafetai ale susuga ile faafeagaiga mai Samoa ia Livigisitone Peseta ma le mafutaga Matagaluega Metotisi Tafagamanu i Aukilani, ile mamalu ole auvalaaulia aemaise ai ole afioga ile Sea a Aukilani Matu ia Oianatai Matale, ae faapea susuga i faafeagaiga mai matagaluega taitasi o faasinoti e lua ale Metotisi i Aukilani, e tusa ai ma la outou foai ile faatalauula atu ale matagaluega Metotisi Tafagamanu mai Samoa.
