Ole oo mai ole tala faavauvau ile maliu faafuasei ose tasi o tamalii ole atunuu, ose uso ma se tuagane i ona aiga pele, ae ose uo mamae ile toatele o ana paaga e lē gata i Samoa aemaise lava i Niu Sila nei ile atunuu ua faamautu ai o ia, ua sola faafuasei ai foi manatu, ma ua tau lē mafai ele mafaufau ona talia lenei tala faanoanoa, ma tagi lotulotu ai le agaga.

Peitai ole motusia faafuasei ole mafutaga ma lenei tamalii ae ose uo pele foi ile tusitala ma le auaunaga ale Radio Samoa ma le Samoa Times, ua toe tomanatu ai ma sa’afi ile talaaga o Malagamalii, aemaise lava ile lasi o ona uiga lelei ma nisi o taleni ma tomai sa faa’oaina ai o ia ele Atua mai lava i lona soifua mai seia oo nei ina ua motusia faafuasei le mafutaga ma ia ona ole maliu ma le oti.

Ole tofa ia Malagamalii Alefosio Nonumalo ose tamalii ua lauiloa ile mamalu ole atunuu i lana taleni ma le meaalofa ale Atua oloo iai, ile taina lea o sipuni i taimi o faafiafiaga mai lava i lona laitiiti seia oo lava ina matua.

Oloo ia te ia foi le meaalofa ole faasalalau e pei ona lausilafia ai ele atunuu i luga ole leitio ale Radio Samoa 1593AM i Aukilani. E pei ona silafia ele toatele, o Malagamalii Alefosio Nonumalo e po lana vaai mai lava i lona laitiiti, ae ole taleni ma le meaalofa ale Atua oloo iai, e maofa ai tagata ile faaaogāina ole soifua o lea auauna ae lē atoatoa le malosi ole tino.

O ona tuaa ole tamā ia Vaiula Faita Nonumalo ma le tina ia Segia Vaiula Nonumalo. E toatolu i latou ae ulumatua ai Malagamalii Alefosio ile fanau, lona lua lona tuafafine o Amelia Faita, ma lona uso laititi o Faita Nonumalo. Ole aso 11 o Iulai ile tausaga e 1963 na soifua mai ai Alefosio, i totonu o Lotoso’a i Saleimoa.

O lona soifua a’oa’oina na amata mai lea ile aoga tulagalua a Lotoso’a i Saleimoa, ae ole tausaga e 1976 na amata ai loa ona ulufale atu i totonu ole aoga ale Alafamua School for the Blind i Letogo, ae ua 13 lena o ona tausaga. Ose tagata e ulufale atu i totonu ole aoga, e vaivai ile aoga, ae ese le poto ma le atamai i mataupu tau ile aganuu a Samoa.

Poo le ā lava le tele o mea e fai i totonu ole aoga ale Alafamua, ae a oo loa i mataupu tau ile aganuu, e folafola ai ‘ava, lauga faa-Samoa ona numera tasi ai lea o Alefosio. Ose tagata e fai tuafafine i totonu ole aoga ma e iloa foi le ava fatafata ma isi tamaiti aoga ma tagata matutua.

Ole 1993, na faigaluega faatasi ai loa ma le tamaitai o Matafua Faamatuainu ile faalapotopotoga ole Preb ina ua faatuina lea faalapotopotoga i lea vaitaimi. Ina ua faatuina le Preb, na lē toe faia ai loa ni aoga a tauaso tuufaatasi i Letogo, ae ua o loa ave i tua i nuu taitasi aoga a tauaso e fai ai i totonu o latou lava nuu. O Alefosio e lelei tele ile mataupu ole gagana patupatu lea e faitau i lima i totonu ole Alafamua. A oo la ina o i tua e fai aoga, ona ia a’oa’oina lea o tamaiti ile A,B,C, ile faaaogāina o latou lima e faitau ai le gagana patupatu a tauaso.

Ole 2001 na sau ai le malaga a i latou oloo iai manaoga faapitoa i taaloga ale Oceania i Ausetalia, ma sa filifilia mai ai Alefosio e fesoasoani ile vaaiga ole aumalaga, toe fai ma sui o Samoa ile taaloga ole togi pulu mamafa.

Ole 2003 ole tausaga mulimuli lea sa toe aumai ai le autaalo a i latou e iai manaoga faapitoa i Ausetalia ma sa toe filifilia mai ai foi Alefosio i taaloga ia ale Oceania.

Ose tagata e lē manao e ola faalagolago ise tagata, e tau taitaia ia ise mea e manao e alu e fai, e savali lava Alefosio e fai ana faatau aemaise o mea sa galue ai i Samoa. A alu ni malaga a tauaso e faafiafia i nuu i tua, e lē popole le aoga ise tulafale, e alu lava Alefosio e faafesagai ma matai ole nuu lea e fai ai faafiafiaga, pau le mea e manao ai Alefosio ia iloa faalupega ole nuu.

O lana taleni ole taina o sipuni i soo se faafiafiaga ua iloga ai, o ia ole uluai tagata na ia taina sipuni, ae na oo lava i tamaiti laiti faatoa o atu ile aoga tauaso na faasoa lava iai e Alefosio lana taleni i nei tamaiti, ma ose tagata e fiafia e faasoa lona iloa i ona uso laiti i totonu ole aoga.

Ole afe mai ole malaga a tauaso i Niu Sila ile tausaga 2003 e fai malologa ai ina ua mae’a mai taaloga i Ausetalia, o iina na maua ai loa le avanoa o Malagamalii Alefosio e nofo ai i Niu Sila, i lona aiga i Magele le susuga ile faafeagaiga ia Pelenato Taupau ma le faletua ia Ruta Taupau.

Soifua galue i Niu Sila

E pei ona ta’ua ele susuga ile faafeagaiga ia Pelenato Taupau, o Malagamalii Alefoiso, ose tagata tautua lotu, na iai ile faavaeina ole lotu ole Samoan Christian Church i Manurewa e pei ona la faifeau ai. Sa avea ma peresetene ole autalavou ale lotu ma ose taimi sili foi lea ona toatele ai le autalavou a’o tulai mai Alefosio ile tofi, seia oo lava ina faaee lona tofi tiakono i lona loto naunau e fia auauna pea ile Atua ma lona finagalo.

Sa avea ma taitaifono ole lotu ile fa tausaga seia oo mai lava ile taimi nei. Ose auauna sa lima taumatau iai le galuega ale Atua ele susuga ile faafeagaiga ia Pelenato ma le faletua ia Ruta aemaise o ekalesia taitasi a lenei matagaluega.

I totonu o lona aiga, e lē manao Alefosio e ola faalagolago ise tagata, e naunau lava ia e alu e fai mea e manao ai, aemaise lava i ana meaai. E osi aiga, toe fai aiga lelei, e leai se galuega, ae a fai mea ale aiga e manao lava e alu e faamaopoopo mea uma ole aiga, i Leauvaa, Saleimoa ma Vaiusu.

Sa galue ile faleaiga o Aunty Ela i Otara i nisi o tausaga ile faasalalauina lea o meaai taumafa, ona sosoo ai lea ma le faleaiga ole susuga ia Tavai Meni le My Samoa seia oo mai lava ile taimi nei. Sa galue i luga ole leitio ole Radio Samoa 1593am i tiute ole afiafi ole Aso Lulu aemaise o nisi o kamupani faletaavale. Ole tele o mea ole komiuniti Samoa i Aukilani e lē misi ai lava lenei tamalii i lona faamaopoopoina aemaise oni sailiga seleni e ta’ua ai le Manu Samoa.

Oloo auai foi ile Walking Samoans ile vaega ua ta’ua ole pipii ile pusa meli poo i latou ua lē gafatia le malosi atoatoa ole tino, aemaise o lona siufofoga logolelei oloo ia fofogaina ai le Ad poo le faalauiloa ale Walking Samoans lea oloo taulogologo ai pea le atunuu ia fai le faamalositino auā le ola soifua maloloina lelei.

Oloo resitalaina foi Malagamalii Alefosio ile faalapotopotoga ole Royal New Zealand Foundation of the Blind i Niu Sila. O ona uiga, i nisi o taimi, e lē manao e fai e se tagata se tala e tuu a lalo ai tagata tauaso, e pei e foliga mai e manatu faatauvaa i tagata oloo iai manaoga faapitoa.

Ole afiafi ole Aso Lulu ole vaiaso ua mavae, 31 o Ianuari ile tea ole itula e iva na alagaina mai ai le tala faanoanoa i aiga, uo ma ē masani, ua faamanavaina ele Atua galuega a lana auauna ia Malagamalii Alefosio Nonumalo i lona aiga i Magele. E ui ile faigata ona talia e tagata uma lenei tala faanoanoa ona ose tamalii ua lausilafia i ona uiga mālie ma le tausaafia, aemaise ole osi aiga, ae leai lava se fai loto e pule lava le Atua.

E! le oti e, o fea ea lou tui, le tuugamau e, o fea ea lou manumalo! Ae Amuia ē ua oti, oti oi le Alii, Le auauna lelei e, ma le faamaoni ulufale maia ile fiafia o lou Alii. Aiga faanoanoa, uo ma ē masani, Amuia ē faanoanoa auā e faamafanafanaina i latou.

Ole afiafi ole Aso Faraile nei, aso 9 o Fepuari, ole a faia ai lona Sauniga Faaleaiga (Family Service) ile maota maliu o Ligaliga i Magele, ona oo lea ile Aso Toonai, aso 10 o Fepuari, o Toe sauniga mulimuli o Malagamalii Alefosio Nonumalo. E po ile vaai, ae pupula i lona mafaufau. Ia manuia lau malaga Malagamalii Alefosio Nonumalo.