O aga masani lava pe a oo ina amata se galuega fou e ao ona faapaia le eleele ma le fanua e talosia ai le saogalemu o tagata e galulue ai. Pei foi ona molimauina mo le galuega tele ile auala sima i Vaisigano. Na saunoa ai le Palemia e faafetai ile malo o Iapani, mo le tupe tele ole a siitia ai foliga vaaia ole auala lenei ae ole taulaga o Apia.
Ole taua o lea vaega ole auala, ona o fesootaiga agai atu ile uafu autu i Matautu, ma isi vaega o faia ai galuega tetele ile atunuu. Na amata mai le auala lea ole auala uamea ae mulimuli ane toe suia ile tausaga e 1953 ile auala sima, pei ona oo mai ai ile taimi nei.
Ua tele afā ma tafega, o ti’a’a pea le tu ale auala, peitai ua faasolo lava ina vaivai talu aafiaga mai le elea ma le malosi faanatura o mea tutupu. E ui ini auala sa taumafai atu iai e faaleleia pea mai lea taimi i lea taimi. Sa faasaina ai lava ona toe uia e loli oloa tetele, ma isi masini mamafa ina ia taumafai e puipuia le saogalemu o tagata feoai.
I faamaumauga, ole Afā o Eveni ole 2012, na faatuaina ai le tatau ai ona toe suia ole auala lea i Vaisigano. Ma amata ai feutanaiga ile va ole malo ma paaga, pei ole malo o Iapani, ma latou faamautuina mai ai le fauga ole auala.
Ole tausaga talu ai, ia Iulai 27, na sainia ai lea fegaiga ile va o Iapani ma Samoa, e tuuina mai ai le tupe e $44miliona tala mo le fauga ole auala i Vaisigano. Oloo fuafuaina e amata galuega ole auala ile masina fou o Me.
Saunoa le taitai ole malo, afioga ile Palemia, ole auala e 75 mita, le umi, ole a see ese ma le mea o iai nei, tusa ma le 20 mita. Ole a faalua laina ile ituala i luga ole auala sima fou. O ala savali, ma moli auala, ma ole a oo lava ile taamilosaga o taavale i Matautu le faiga o galuega faaleleia.
Ole taimi nei oloo faaauau pea galuega faaleleia ole uafu tele i Matautu, ile faalauteleina, e le malo o Iapani, fatasi ai ma le taligalu. Ae e ese mai ai ile galuega ole auala sima lenei i Vaisigano, ole a tele ai lava se suiga matagofie ile gataifale ma lona taulaga ae ole taulaga vaa.
Na matua faafetaia ai e le Palemia, le malo o Iapani, ile fesoasoani tupe ua liligi atu, ile tusiga ole ata, ole fauga ma le vaavaaiga ole poloketi lenei i Vaisigano. Faapena foi ona amanaia e le malo o Samoa, le auai ole Peresetene ole ofisa o Iapani i Samoa, Mr Shinicki Kitaoaka, ile amatga o lenei faapaaga e ala ile poloketi.
Na aloaia foi e le alii Palemia i lana saunoaga le sao ole pulega o felaua’iga , ma isi vaega ole malo, ua latou galulue faatasi ma soosoo tau’au, ile taumafaiga mai o lenei atina’e.
O nei fesoasoani ale malo o Iapani, e lē gata o auala, uafu, faleaoga, tane vai, o tomai faapitoa pei ona aumai ai faiaoga ma tagata popoto faapitoa e galulue fua i Samoa.
O nisi nei o vaega, na talanoa ai le sui ole malo o Iapani, e fesoasoani tele ina ia siitia ai le soifua maloloina o tagata Samoa. Aemaise ole agai i luma ole tulaga tau atina’e i mea fai, faatasi ai ma le atina’eina o ona tagata soifua.
