Eseese tapua’iga ae tasi le fatu na fofoa a’e ai soifua i Fasitootai

Taulaga soifua ma le mamalu ole mafutaga a Fasitootai i Brisbane ile latou talia ole faatalauula mai Samoa ile Ekalesia Katoliko
Taulaga soifua ma le mamalu ole mafutaga a Fasitootai i Brisbane ile latou talia ole faatalauula mai Samoa ile Ekalesia Katoliko

E ui e eseese faletapua’i, ma ekalesia ua auai atu iai le toatele o alo ma tamafanau, paolo ma gafa ale alalafaga o Fasitootai, ae tainane taulaga soifua o nopia’i ma alala i Kuiniselani, ae ina ua lauina le tusi mai Samoa na tasi loto o Isaraelu moni e opogi le faatalauula mai Samoa ale Ekalesia Katoliko. Ose faataitaiga sili lenei ona tāua ile tele o augatupulaga o tutupu a’e, le molimauina o fealofaniga i va o tagatānuu moni ina ua auaufaatasi e ala ile faasalalauga na tuuina ile lomiga ale Samoa Times faapea luga i leitio e talo ai se feiloaiga.

Ole Aso Gafua ina ua mae’a le Eseta, na usuia ai le fonotaga lona tolu talu ona faavae mai le mafutaga a Fasitootai i Kuiniselani, ma e maeu foi le toatele o i latou ua tasi o latou loto e aofia ai taulaga soifua ma faletua faapea le loaloa o alo ma tamāfanau i lo latou sagisagi fiafia ile fia faafofoga ise tala e uiga ile tusi mai Samoa.

Na ta’ita’i le susuga ia Pr Samuelu i isi fonotaga muamua ae ole fono talu ai na muai sii mea i Matautusa e ala ise taulaga siitia e lana auauna le tausi matagaluega ia Rev Moloka Toleafoa ole ekalesia Metotisi a Logan City, ona sosoo lea ma le aliitaeao ma faafeiloaia le paia maualuga ile mafutaga. Na fetalai le taitaifono le fetalaiga ia Taufono Tago’iaega Faamanū Levi, ma ia faapa’i foi i paia ma mamalu o tupu ma tamalii aemaise Lupe Faalele ole talalelei ua auai atu.

Na ia saunoa ile maualuga ole viiga ole Tapaau ile lagi ona ua mafai ona maua se laolao lelei ua aumaia e le Atua e faigofie ai ona mafuta le paia maualuga i alo ma Tamafanau aemaise o taulaga soifua a lenei nuu, Paolo ma gafa e malu ai Fasitootai ia Samoa i totonu o Kuiniselani.  Ole paia lava lea ile Aiga Taulagi, le Matua o Usoalii ma le Ma’opu ole Tuiaana, le mamalu ile Faletitu ma le Fale Fasitoo. Ole mafuaaga ua mafai ona maua ai lenei mafutaga fiafia ona ole faatalauula mai ase tasi o fatafaitaulaga i totonu ole afioaga mo se fesoasoani a alo ma Tamā fanau a Fasitootai i totonu o Kuiniselani i Ausetalia nei mo sina fesoasoani ile fia fausiaina ole malumalu ole Atua i totonu o Fasitootai.

Ua silafia uma lava a ta’u loa tusi mai Samoa ia tasi lava le auga o aute o seleni peitai, e lei tuta’ia ai le gasolo atu ile fia mafuta faatasi. O lenei tusi talosaga na aumai mai Samoa ile susuga ile Fesoasoani Katoliko ma le ekalesia, e fia fausia se latou malumalu tapua’i ina ua iu le fono ale afioaga, ma ua taliaina foi e le afioga ile Akiepikopo, Afioga ia Alapati Mata’eliga le faia ose malumalu tapua’i i Fasitootai.

Na maua le avanoa e feiloai ai le nuu ma talia lelei ai loa le fanoga ole susuga ile faafeagaiga ma le ekalesia ma ua faavae ai loa ma le mafutaga a Alo ma Tamafanau a lenei nuu. E viia ai le pea le agalelei ole Tamā oi le lagi ona o lenei avanoa lelei ua feiloai ai nisi ole afioaga ua leva e lē o toe feiloai.

O nisi o taulaga soifua ua auai e aofia le susuga ia Pr Samuelu ma le faletua ia Emma Afamasaga (Ekalesia Aso Fitu ole Toe Afio Mai i Logan City), Rev Moloka ma Uaine Toleafoa (Ekalesia Metotisi Logan City) faapea le susuga ia Ps Rikisone Uelese (Ekalesia AOG Logan) faapea le susuga ia Rev Sili Mo’a EFKS. E iai nisi o Isaraelu moni faapea lupe faalele ua fesootai atu, e iai se taimi ona auai atu lea ona o tuatuagia lava o galuega.

Ua fuafua ole masina o Iulai e taunuu mai ai le aumalaga mai Samoa ale susuga ile Faafeagaiga ma sui ole ekalesia e fia faia se posiva e sailia ai se seleni auā le fausiaina ole malumalu tapua’i. Oloo faia lava sailiga seleni i masina uma ma ua tupu ma ola le mafutaga ua atoa le 31 o matafale. Ole isi feiloaiga ole faaiuga o Aperila ile aso 28.

Ole Laulau a Fasitootai i Kuiniselani e aofia ai:

Taitaifono: Taufono Tago’iaega Faamanū Levi

Failautusi: Tuiatua Palemia Moemanatunatu Seleipata

Teuoloa: Lio Saosaufa’i Malaefou Tupufua Ioane