Ua faamaonia mai nei e se tasi o kamupani fai ata tifaga mo le fanau laiti (Disney) le filifilia o se tasi o tamalii o le atunuu, Susuga Seiuli Dwayne Johnson poo The Rock e pei ona silafia ai e le toatele, o ia o le a faaleoina le leo o se tasi o character o le ata tifaga komi (cartoon) mo le fanau, lea ua faaigoaina o le “MOANA”.
O lenei ata tifaga o loo tuufaatasia i Amerika, ma o loo faaautu atu i se teine Samoa e igoa ia MOANA ma lona tamā ia MAUI, lea o le a faaleoina e le Rock lona leo. O loo faamatalaina ai le taimi sa folau atu ai tagata Pasefika e saili ni motu e avea ma o latou atunuu ma faamautu ai.
Ma o loo faaata mai foi i lenei ata foliga o le sogaimiti poo le pe‘a a Samoa. Faamatalaina e le faatonu o le MOANA, o loo faaata mai e uiga o MAUI, uiga masani o se tamā Samoa o le taumafai lea e puipuiamalu o latou fanau teine mai soo se mea lava na te faia. Lea la ua faaigoaina ai loa o ia o “Le Toa o le Pasefika”.
O le alii o Dwayne Johnson o se alo (grandson) o se tasi o tamalii Samoa sa lauiloa i lenei faagatama o piiga i ona foi vaitaimi, o Fanene Pita Maivia ua maliu, ma o Dwayne Johnson o loo alala nei o ia i Amerika.
O le ata tifaga o MOANA o le a amata ona faaalia ia Novema o le tausaga fou, 2016.
