Ua fofoa mai le vasega o le Tausaga 13 a le Kolisi o Aorere se vaega o ni talavou ua mafai ona latou ausia tomai e gaosi ai ni oloa ma tuufaatasia i se vaega faapisinisi e faalauiloa ma faatau atu ai nei oloa. O le igoa ua faaigoa ai le latou pisinisi, o le ‘Matai Nonu’, e pei ona faaulu ai le latou kulupu i le Young Enterprise Scheme mo le tausaga lenei 2015.
O oloa ua mafai ona gaosia e le ‘Matai Nonu’ e iai le fasimoli o le Nonu Soap, ma le kulimi mo le uuina o le tino le Nonu Body Lotion.
Ta‘ua i se tusitusiga na tuuina mai e lenei vaega a le ‘Matai Nonu’, lo latou fiafia tele e faaaogā lenei fualaau ‘aina (fruit) o le nonu, talu ai latou te mananao ia iloa e tagata le tele o aogā o lenei fua o le laau o loo ola lava i o tatou laufanua ma faigofie ona avea ma puna‘oa mai o tatou lava atumotu o le Pasefika e pei o Samoa.
Lona uiga o le a fesoasoani tele i lo tatou tamaoaiga, ae o le a mafai foi ona aogā i lo tatou soifua maloloina e pei ona mafai ona gaosi ai na oloa na ta‘ua muamua. Ma o se tasi lena o mafuaaga ua faatāua tele ai e lenei vaega le fua o le Nonu i le gaosiga o a latou oloa poo products.
O oloa ua gaosia mai le Nonu e lenei kulupu o talavou faipisinisi, o loo alumia ma tosina i ai le silasila a maketi i totonu o Niu Sila, ona e lē o taatele a latou oloa nei i faleoloa i le atunuu, aemaise o lea e faagasolo pea suesuega i le ono mafai e vaega o le Nonu o loo gaosia ai nei oloa, ona avea o ni mea e aogā e teena ai le aafia o le tino o le tagata i le ma‘i matautia o le Kanesa, pe ono mafai foi ona fesoasoani e taofiofi ai le vave ona oo le tino matua i se tasi (Anti Cancer & Anti Aging). Ae pei ona ta‘ua, o loo faagasolo pea suesuega i le faamautuina o lena talitonuga.
O nisi o itu o loo mataina ai ma tāua taumafaiga a lenei vaega o talavou faipisinisi, ona o lea ua mafai ona latou galulue faatasi ma le Housing NZ, e tuuina atu ai le tasi le pasene o le polofiti poo tupe faasili e maua mai le faatauina atu o a latou oloa, ma foai atu mo le saunia o Winter Wellness packs mo nai aiga o loo nonofo i fale o le Housing NZ ma e lē o lava le faasoa, e fesoasoani i le tulaga faaletonu o loo iai isi aiga aemaise lava i taimi nei o le taumalulu, e pei ona tulai mai ai nisi o soifua ua maimau talu ai nei, ona o le lē lava o fesoasoani tau le soifua maloloina o loo latou maua.
O le naunautaiga lena i le ‘Matai Nonu’ ia faia so latou sao i le foai atu o nei mea e fesoasoani i o tatou tagata Pasefika ma i latou uma o loo nonofo i le faaitu o Aukilani i Saute, ina ia lava puipuia i latou i vaitaimi nei o le ma‘ati‘ati o le taumalulu.
O le faanaunauga foi o nei talavou faipisinisi, ia iai ma ia toatele nisi fanau talavou a le Pasefika e mafai foi ona latou ausia lenei sitepu tāua, o le mafai lea ona latou amataina ni tamai pisinisi, ma faasolosolo atu ai lava ina ausia nisi mea e tetele atu, e lē gata mo se manuia o i latou lava ma o latou aiga, ae o so latou sao foi lena i le faatupulaia ma faaleleia atili le tamaoaiga o lo latou atunuu.
