O le fonotaga (G20 Summit) sa feagai ai taitai o malo tetele o le lalolagi na usuia mai ai le fono lona 9 i le taulaga o Brisbane sa tele ina tapunia ai auala ma nisi o nofoaga aemaise le avea lea o le Aso Faraile ma aso malolo o nisi vaega e lē gata o galuega ae faapea foi aoga.
O le tamaita palemia o Ausetalia ile 2011 Julia Gillard sa talosagaina ina ia faia mai i Ausetalia le fonotaga i le 2014 lea la sa taitaifono ai le Palemia ia Tony Abbot i lenei tausaga. Sa fai si tumutumu o lea fonotaga auā e ova ma le 6000 leoleo e aofia ai ma leoleo Niu Sila sa galulue, 1500 securities lea e iai le kamupani a se tasi foi o alo Samoa ia Martin Scalon.
Sa matuā tulimatai e tagata le uluai saunoaga a le Peresetene o Amerika ia Barack Obama sa faia lea i le Iunivesite a le UQ i St Lucia, ma e tele vaega tāua o le saunoaga aemaise o lona faailoaina o le tulaga o le Climate Change, lea ua saunia ai se maliliega ma le Malo o Saina e galulue faatasi mo le faaitiitia o le faaaogāina o kasa oona e kamupani tetele e mafua mai ai le vevela mai asu mafiafia faapea le filogia ai o le ea i tulaga faaletonu.
E 3 piliona tala se vaega tupe ua faailoa e Barack Obama mo le fesoasoani i atunuu tau atinae o le lalolagi mo le faatinoina o galuega talafeagai e mafua mai le palapala ma le vevela.
Saunoa le Peresetene, a lē vave faia se gaioiga i le Climate Change e ono afaina ai le tele o motu laiti o le Pasefika. O le alii Palemia o Ausetalia o loo taitaifono i lea fonotaga tāua, ma e matuā tetee lava i le Climate Change, lea sa ia toe aveesea ai le faalafogaina o le faaaogāina e kamupani tetele o kasa oona (Carbon Tax) i le tausaga nei, sa pasia e le faigamalo a le Labor a Ausetalia i le tausaga 2012 a o Palemia Julia Gillard.
E tele naua nisi o vaega tāua e pei ona maimoa i ai i televise. O le afiafi o le Aso Sa sa usuia ai foi le isi fonotaga tele ua igoa ole G20 Interfaith Summit-Griffith University. Na toatele le sui eseese sa auai i lea afiafi i se taumafataga tele e tatala ai lea fonotaga ma na maua ai se avanoa e feiloai atu ai i nisi o tamalii Samoa e pei o le faipule a Magele le tofa ia Su‘a Williams Sio.
Na maua lona avanoa e saunoa ai i luga o le leitio a o fesootai atu le Penina o Asuisui ma le Radio Samoa i Niu Sila. O le taeao o le Aso Gafua lea sa iai saunoa ai e fai sao i lea fonotaga. E ‘anoa ma logomalie le tele o saunoaga e pei ona faafofogaina i ai le toatele, e faatatau lava lea i le autu o le summit i faatuatuaga eseese.
O nisi o mataupu sa talanoaina, o le saolotoga o tapuaiga i Ausetalia ma fafo atu; o a sootaga i le va o saolotoga o tapuaiga ma tulaga tau tupe; tulafono, tapuaiga ma tulaga tau seleni; ma nisi lava vaega tāua sa talanoaina.
O le Iunivesite a Griffith sa faatautaia lea fonotaga ma o le fofoga o le po o le susuga ia Dr Brian Adams. Sa auai foi le sui faipule mai Samoa Hon Lautafi Fio Selafi Purcell MP, Peresetene o le Mafutaga a le Leo o Tagata Samoa e galue i le Access, le tofa ia Faimalotoa Ioane Pale, nisi o sui Samoa sa auai. O le Iunivesete o Griffith liaison officer o le tamaitai o Emma Tanuvasa.
