E ui ina lugā ma lālō le mataupu o loo faavesivesi ai nei le Lakapi a Samoa, ae lē o mafai ai ona faavaivaia le faatinoga o taaloga ma atinae lelei ina ia faaleleia pea le Lakapi a Samoa atoa ai ma le tapueina mai lea o taleni ma tomai i alo ma fanau i Samoa lava.
Masalo ua lauiloa le taamilosaga i Niu Sila ma Ausetalia ua faaigoaina o le Four Nations Rugby League lea foi sa tauva ai le Toa Samoa.
Atonu o le lagona foi lea i se tofa faapea foi se faautautaga mamao ua afua ai lea taamilosaga ma faatāuaina ai Savaii, Manono, Apolima Upolu.
Talafeagai tonu lava le taualugaina o lea taamilosaga i Samoa ma le atoaga o le uluai tausaga talu ona tuumalo le Susuga i Le Papaliitele Peter Fatialofa.
O lea taamilosaga o loo lagolagoina malosi e le “Vailima” ma o ia taaloga ma le taualugaina o lea taamilosaga sa faia lea i le nofoaga poo le malae autu a Tama Tuai a le Malisi i Lotopa, ona o galuega o loo faagasoloina nei i le toe faaleleia o le nofoaga mo taaloga Lakapi i le Malae i le Apia Park, i lona toe faalauteleina ma toe fausiaina e fuafua mo le taaloga faitaulia i le tausaga fou ma le Au tele a Niu Sila le All Blacks.
Sa matuā faatumulia le nofoaga a le Malisi i Lotopa i lea aoauli i le toatele o le aumaimoa, o tapuaiga mai Au eseese mai le motu tele i Salafai, Upolu, Apolima ma Manono ae faapea foi isi na malaga atu i fafo e molimauina lea atinae lelei i le taaloga i Samoa.
Na mataina foi i lea aoauli le faaaogāina o alii laufali Samoa lava latou mai le Iuni Lakapi a Samoa. Tusa ai ma faamatalaga na taunuu mai i lea aso i le malae i Lotopa e faapea, o le taualugaina o ia taaloga e maua ai foi ma le avanoa e filifilia ai ma le Au a le Samoa A mai ia taaloga.
Sa vaaia foi i lea taamilosaga nisi sa taaalo i le Fitu a Samoa muamua ae ua toe agai i le malae. Sa faatasi ai foi i le malae i lea lava aso le Faiaogaulu a le taitoafitu e molimauina ia taaloga. E leai se Au na faaletonu i lea aso aemaise ai lava le matagofie o taleni ma tomai i alii taaalo mai Savaii, Upolu, Apolima, Manono.
O le taaloga autu la o lea afiafi sa saili siamupini ai Savaii ma Manono i le Ipu autu lea sa lagolagoina e le Falepia a le Vailima i Vaitele. Ina ua mae‘a le taaloga autu i lea afiafi na manumalo ai Manono ia Upolu i toe sekone lava o le taaloga ae faō loa le ‘afa a Manono i le fu‘a tulimanu ma manumalo ai loa Manono i le Ipu Autu mai le Vailima.
O se tasi o vaega matagofie o le taleni mai i alo ma fanau i totonu lava o Samoa, o se faamanuiaga tele lea i le vaavaai mamao i le lumanai o Samoa mo malo ma fanau a Samoa i le lumanai. Na taualugaina taaloga i lea afiafi i le tufagafaailoga i le Malae a Malisi i Lotopa i lea lava afiafi.
O le saunoaga faapitoa mai le Faauluuluga a le Iuni Lakapi a Samoa, faapea foi ma le saunoaga mai le Pulega a le Vailima i Vaitele e faafetaia ai le lagolagoina o lea taamilosaga, ma toe faamautuina ai le toe lagolagoina o lea lava taamilosaga i le tausaga fou.
