O le tamaitiiti e 5 tausaga lea na sao mai i se faalavelave i le sami i le mae‘a ai o le Kirisimasi, na faateia i le vaiaso na tea nei i le tu atu o le Komesina o Leoleo, Fuiavailiili Egon Keil i le fale o iai nei ma lona tamā ma lona aiga i Vaitele.
O se asiasiga na avatu ai ni meaalofa ma ni taumafa e le taitai o le Matagaluega o Leoleo mo lea tamaitiiti a o feagai ai pea ma faanoanoaga o le maliu ai o lona tina ma lona uso matua atu ia te ia ona o lea faalavelave.
O le aso 26 o Tesema o le tausaga na tea nei, na tulai mai ai le faalavelave lea ina ua agai lea tamaitiiti ma lona uso ma le latou tina i Mulinuu mo se taelega. Na toatele lava tagata na matauina na iai i lea aso mo tafaoga o aso fiafia.
O se tafaoga na iu i loimata ina ua malemo le tina o lenei tamaitiiti ma lona uso matua ae na semanū lava foi e uma ai le ola o le tamaitiiti lenei peitai na vave ona avane i le pa‘u mātū ma faasaoina ai o ia. E toatolu tagata na maliliu i lea faalavelave i lea aso. Sa iai se isi alii na maliu ai foi ma na toeitiiti lava a faaletonu atu ai ma ni alii leoleo se toatolu na taumafai faatasi e feausi i le nofoaga lea na tafefea i ai le tina lenei ma lana fanau.
O se faalavelave lenei ua amata ai nei ni polokalame a le Matagaluega o Leoleo ina ia faamalosia le iloa o le tali atu i faalavelave faapenei e leoleo uma o le atunuu ma o le Koluse Mumu lea ua fesoasoani i le matagaluega auā le faatautaiga o aoaoga.
Faaalia e sui o le Koluse Mumu e tāua tele le iloa e lē gata i leoleo ae faapea foi tagata uma lava o Samoa o nei tomai ina ia mautinoa e mafai ona faasao mai i latou aemaise lava i latou ua lē iloa se mea i le taimi o faalavelave ma ua lē mānava.
Na manino i ata na pueina o lea faalavelave sa telē lava le taimi na aumai ai le tamaitiiti matua i luga i le pa‘u mātū ae e leai ma se tasi o tagata na laveaia ae o tagata foi na tumutumu atu i ai e iloa fai le auala e faamānava ai le tamaitiiti, ma na umi o taatia le tamaititi lenei e aunoa ma se fesoasoani muamua na ave i ai. O lea la na toe faatatope ai i le falemai tele i Motootua peitai e oo atu ua uma lava lona ola.
E ui o lea, ua mae‘a le tolu vaiaso talu mai lea faalavelave ae o lea ua toe foi le tamaitiiti laititi na faasaoina i lona tamā ma maua ai loa le avanoa e asia ai e le Taitai o le matagaluega o Leoleo ma toe ofo atu faamafanafanaga i le aiga aemaise o le tamaitiiti lenei ona o le tuua ai e lona tina ma lona uso o le aiga ona o le oti e mafua mai i lea faalavelave.
O le faafetai a le tamā o lea tamaititi ona ua faasao mai si ona atalii lea semanū foi e uma atu ai lona ola ona o lenei faalavelave.
