O le tamaitai ia Lisa Bridget Mapu o lē ua faaigoa ai le faalapotopotoga e ta‘ua o le LBM Foundation, na maliu i le masina o Oketopa i le tausaga na tea nei, ma o le tolu ai nei o masina talu ona faaigoa lenei faalapotopotoga ia te ia.
O le tausaga e 2012 a o faatoa 11 ona tausaga na malaga mai ai i Samoa ma lona aiga mo le uluai taimi ma tauaao atu i le Kolisi o Alofi o Taoa se meaalofa o meaaoga mo le fanau i lea itu o le motu tele i Salafai.
O le foai lea na ta‘ua e le tamā o lenei teineitiiti, na vina ai loa ma Lisa ina ia faaauau ona faatino e lona aiga fesoasoani faapea ona ua ia malamalama i le tele o manaoga o fanau i Samoa i nisi o meaaoga e faaleleia ai a latou aoga. Na faataatia ai faapea fuafuaga nei peitai i le 14 o tausaga o lea teineititi ae maliu, lea la ua faamalosia e ona mātua, uso ma tuagane lona manaoga ua mae‘a faaali, ina ia fesoasoani e atinae aoaoga a fanau o Samoa.
O le aiga lenei e nonofo i Brisbane i Ausetalia ae ua avea faanoanoaga o le maliu o lenei teineitiiti ua saga unai ai loa ona uiga foai ma le alofa e lona aiga.
Ua amata lenei taumafaiga i le Kolisi o Vaimauga i Apia ma e iai le konekarate ua sainia i le va o le Faalapotopotoga lenei o le LBM ma le aoga.
O le foai o le a toe asia mai le faaaogāina i le isi ono masina o lumanai. E tatau ona vaaia se suiga i le tulaga o aoaoga a le fanau ua faaaogāina ia meaalofa ma afai o le itu lea o le a faaauau ona foai mai le LBM i tausaga taitasi.
O le meaalofa e aofia ai masini komepiuta e valu, o le masini mo le faaola ai o computers, silia i le afe tusi faitau mo le faletusi, masini lolomi poo printers ma api aoga o vase ma vilipeni ma isi.
Na agai le aiga lenei ma saili tusi aoga ma masini mai i nisi o Faalapotopotoga, o aulotu ma pisinisi i totonu lava o Brisbane ma na faapea foi ona foai ane nisi o sui o le aiga lava lea o Mapu i lenei foai tele.
O le uso matua o Lisa o Hanna ua faauluulu i ai lenei Faalapotopotoga ma ua iai le faamoemoe e faalautele i isi foi aoga i Samoa nei lava ia lea foai i tausaga taitasi.
Na talia ma le agaga faafetaia e le aoga a Vaimauga lenei foai ma e iai le manatu o le a faigofie aoaoga a le fanau ona o lenei foai.
