O le vaaiga tele lea i le fonotele a malo tauatiae o le lalolagi na mafai ona ausia i le usuia ai o le fono lenei i Samoa.
Mo le uluai taimi ua telē le faamamafa ua ave e atunuu tetele i malo lava ia o le Pasefika ona o le mafai ona omai i Samoa ma ua sao ai se leo o atumotu laiti o lenei itulagi.
Ona o tausaga ua tuanai na tele lava ina faalogo taitai o malo tetele i finagalo faaalia ma atugaluga o atumotu laiti tauatiae o Aferika faapea ai le Karepeane, ae o le Pasefika ua na o se vaega laitiiti o le lalolagi, ma sa tele lava ina faatuatuanai o latou lagona.
O le mau lea a le tele o taitai o malo tetele nei i folasaga o le fono tele lenei a le SIDS, o le aogā o le agai mai i Samoa ua iloa ai le tele o le aafiaga o atumotu o lenei foi itulagi le Atu Pasefika e lei iai se tasi o i latou ua vaaitino i ai. E ui o lea o le galuega ua faia e Samoa e tali atu ai i le tele o nei atugaluga ua faaosofia ai foi le manaoga e fesoasoani.
Mo le taimi muamua ua tele isi fono na taloina i tua mai o fono tetele na faatulagaina, ua mafai ona iai le aso mo Tokelau, o Tuvalu, o le Atu Kuki, o le Atu Solomona, Fiti ma Papua Niu Kini. O atunuu uma nei na unai uma o latou manaoga i taitai eseese o le lalolagi ina ua agai mai i Samoa i le fono tele lenei. O faataitaiga na folasia e Samoa ma asiasiga na faia i nofoaga na aafia i le tsunami atoa ai le afā o Eveni, lea ua mafai ai ona molimau taitai o atunuu i Europa, atunuu o le atu Arapi, Asia faapea ai ma isi vaega o le lalolagi i le unai ua faaauau ona fai e atumotu laiti o le Pasefika.
O le tupe la lea na malilie atunuu tetele i le mae‘a ai o le SIDS e aumai i atumotu laiti o le lalolagi le SIDS auā le toe faaleleia o nofoaga ua aafia i faalavelave faalenatura talu ai suiga ogaoga o le tau e $1.9 piliona tala Amerika.
Na amata i le $1.4 piliona tala Amerika ae na mae‘a le fono ae toe sau le faaiuga ua faaaopoopo le isi 5 miliona tala Amerika i lea aofai. O le mau a le Sui palemia o Samoa sa iai i lea fonotaga tele na fai ai lea faaiuga, o le faailoga lea o le malilie o taitai o malo mai i fafo, ua mafai ai ona faia se fesoasoani faapea auā e lē masani ai.
O le masani e ui mai lava fesoasoani i lalo o atinae e pei o atinae o le vai, o le eletise, o le faaleleia o galuega tetele a lea malo ma lea malo, ae o le taimi muamua lea ua na o le faamatuu mai lava o le tupe ma le faamatalaga e faasafua i atumotu laiti ua aafia i suiga ogaoga o le tau.
Ona pau le eseesega o le fesoasoani lenei mai isi fesoasoani masani, o le a faafaigofie ona talosagaina tupe nei auā o le meaalofa ua tauaao sa‘o mai, auā o le isi lava lea faafaigata o galuega faatino a atunuu laiti na laga i le fono lenei, o le faigata tele lea o gaioiga ina ia tali atu i aiaiga o le maua o nei fesoasoani.
