O le palota tele a le atunuu o sosoo ai nei i le tausaga e 2016, ua valoia le toatele o ni sui tauva tamaitai o le a manumalo mai ai mo nofoa o itumalo i le Palemene, auā e toa sefulu sui faipule tamaitai ua valoia o le a tulai mai i le faigapalota tele lea a le atunuu.
O se valoaga e le o nofoai ai se faalapotopotoga o tina ma tamaitai ua amata ona galulue nei e tapena le lotoifale o ni tamaitai o loo fuafua mo lea faiga filifiliga tele poo le palota aoao a le atunuu.
O se sui o lea faalapotopotoga ua lē manao e faailoa lona suafa ua ia faaalia e faapea o le a lelei se taunuuga o ni sui tamaitai o le a tauva auā o le a lē gata ina iai ni tamaitai e manumalo i le aofaiga o palota o le a latou maua, ae o sui foi o le a maua le pasene o le tuuaofaiga o palota e mafai ai ona sao i le Palemene e tusa ai ma aiaiga fou o le faavae ma le tulafono o faigapalota.
O se faatalanoaga ma le afioga i le tamaitai minisita o le kapeneta le afioga Fiame Naomi Mataafa i le masina ua mavae a o tauaofia le fono aoao faitulafono, na ia faailoa mai ai le maualuga o le tulaga lagolagoina o sui tamaitai i nisi o palota ua mavae. “A e silasila i faamaumauga o loo iai, e sili ona maualuga le lagolagoina o tamaitai i faigapalota ua mavae pe a faapasene, nai le itupa o alii. O lona uiga o iina e iloa ai e maualuga lava le itu lagolagoina”.
O le finagalo o le afioga Fiame na mafua i le taunuuga o le palota laititi a Gagaifomauga numera muamua lea na manumalo mai ai le sui faipule tamaitai le tofa Faimalotoa Kika Stowers Ah Kau, auā a fua i sui e toalima na tauva e toafa alii ae na o Faimalotoa le tamaitai.
O le luitau foi lea mo sui tamaitai o loo fia tauva i le palota tele o le 2016, ia tele lo latou sao i faiganuu ma pulega faamatai, ma ia auai i soo se meafai a nuu ma itumalo. O le finagalo o Fiame Naomi Mataafa, o le isi lea itu lelei e maua ai le lagolago lelei mo i latou pe a oo ina faatino le faiga filifiliga a tagata.
E toa sefulu sui faipule tamaitai ua valoia o le a tulai mai i le faigapalota tele lea a le atunuu, ma o le finagalo o le sui o le faalapotopotoga o loo tapenaina sui tauva, o se fuainumera lelei tele lea o le a maualuga ai le leo o tina ma tamaitai i upufai o le Malo.
O loo musu lea sui e faailoa sui tamatai ua iai le lagolago a o latou nuu e tauva, ae o lana faamatalaga mai, e iai se taimi ona faailoa lea. O le a tatou tulimataia nei ia tapenaga ma fuainumera ua valoia nei.
