Ua tatalaina nei le avanoa i mātua e faaulu atu ai o latou alo i le aoga fou ua faatuina nei e nisi o tamalii o le atunuu le afioga ia Laauli S Michael Jones faapea se tamaitai Tonga ia Emeline Afeaki-Mafile‘o faatasi ai ma le susuga ia Falefatu Enari ma lona faletua ia Perehuia o i laua ua filifilia e tauaveina pe pule i le aoga.
O lea aoga o le toe unaia lava o fanau sa faaletonu a latou aoaoga muamua, a o lea ua maua le avanoa e toe totogo ai le moemoe fou auā le lumanai manuia o le olaga o le tama ma le teine aoga ina ia aua ne‘i ola faalōlō.
O le Aso Tofi ua mavae, 4 o Tesema na tuu ai loa le avanoa i mātua e agai atu ai ma fanau e faatalatalanoa mataupu ma galuega o le a faatinoina i le aoga mo le tausaga fou.
O le afioga ia Laauli S Michael Jones ma le tamaitai ia Emeline Afeaki-Mafile‘o, o sui ia o le Board Trustees na auai faatasi ai ma le susuga i le alii pule ia Falefatu Enari ma lona faletua ia Perehuia Enari sa latou faamalamalamaina i mātua vaega taitasi o le a agai i ai le faagasoloina o le polokalame a le aoga.
E ese foi le tāua o lea suiga na iai lea afiafi e tatala lava le faleaiga mo sē fia ua taumafa ma faafesoaa‘i i le faagasoloina o le polokalame.
E 5 faiaoga ua faamautu mai o le a galulue i le aoaoina o fanau faatasi ai ma nisi o faiaoga e toafā o le a galulue fesoasoani i mataupu taitasi. Ua fuafuaina foi mataupu tau i le musika lea ua ofoina atu ai foi nisi o alo pepese iloga o le Adeaze le susuga ia Logovii Tupai ma Feagaiga Fou o le a latou galulue faatasi i lea aoga i le aotauina lava o fanau i musika mo le lumanai.
O Aso Tofi ma Aso Lua o vaiaso taitasi ua faaavanoina nei e lesitalaina ai fanau a o lei oo atu i le taimi e a‘e ai le aoga i le tausaga fou ia Fepuari i lona aso 4. Ae na ta‘ua e le susuga i le alii pule ia Falefatu Enari, ua fai si toatele o i latou ua faatāuaina lea avanoa; o nisi e agai atu i le ofisa e lesitala ai, a o nisi e vili atu i le telefoni ma faatoai atu ni avanoa mo latou alo.
O le fiafiaga foi lea ia i latou o le faatāua e mātua ma fanau o le avanoa ua ofoina mo le sailia o le lumanai manuia.
