Na faatumulia le maota o le ekalesia i le po o le Aso Toonai na tea nei i le mamalu o le auvalaaulia na latou molimauina le faaiuina o galuega o le tausaga i le Autalavou ma alo i le Aoga Aso Sa.
O le susuga i le faafeagaiga taulagi ia Rev. Falaniko Mann-Taito na saunoa e tolaulau ni faailoga tāua na maua e nisi o alo o le ekalesia ma faamanuiaina ai:
O Lelei Tautau ua filifilia i le Under 16 Basketball a Niu Sila. O Marcus Tualagi Tumaai na maua le faailoga i le Tauvaga Aoao a le FAGASA i le Tauvaga Tautalaga i le Gagana Samoa mo le Tausaga Iva ia Niu Sila aoao, ma le tamaitai o Nera Tautau ua mauaina le sikolasipi e aoga ai i Otago ma o ia foi na manumalo i le tauvaga tautalaga o le Gagana Peretania ia Niu Sila aoao. Sa tolaulauina ai foi e faiaoga taitasi o le Aoga Aso Sa mai suega a le faasinoti mai le Vasega Amata e oo lava i le tupulaga Autalavou.
Ua alo atu nei le ekalesia e ave le fanau e maimoa i Samoa i le Kirisimasi. E faataunuu lenei faigamalaga i le afioaga o Manase. O le afioaga lea o le susuga i le faafeagaiga ia Falaniko Mann-Taito, ma o loo malaga ai uma i laua ma le faletua ia Marlene ma le ekalesia e faamaimoa le fanau i Savaii le motu fai mea mafai. Ioe o upu lava e fai i le fanau i nei taimi o le seleselega: ‘O lē e lulu ma le faamaoni e selesele foi le olioli’.
E lei faatamala foi le Fofoga o le ekalesia le susuga ia Toelupe Seaga Toelupe i le faasologa malie o le polokalame atoa.
O le atili matagofie o le po ona o le suamalie i le faalogo i fatuga eseese a le susuga ia Taulaga Tagaloa o le Taitai faaili o le Oneone Sina na faafiafiaina le po faapea ma siva malie a le Autalavou.
E sauni e malaga mo Samoa lenei ekalesia i le aso 16 o Tesema, ma e faapea e taunuu loa i le malaevaalele i Faleolo, toe tuli vaa mo Savaii ma faaauau atu ai le malaga i Manase ma tali ai i le fale talimalo o le Tanu Beach Resort.
Ia manuia tele le faigamalaga i lau susuga Falaniko ma le faletua ia Marlene faapea le ekalesia atoa.
