Ua toe taumafai nei le au gaosi oloa ma pisinisi o loo faatau i fafo a latou oloa gaosi ma le au faifaatoaga e toe faaulufale le talo a Samoa i Ausetalia, ona o lea ua tulaga mai i se tulaga lelei taumafaiga mo le toe ave o lea fua tau faatoaga i Niu Sila.
Ua faaalia e le Pelesetene o le faalapotopotoga o le au gaosi oloa a Samoa faapea le au faipisinisi o loo faatau atu i fafo a latou oloa ma fua o faatoaga le SAME, e toe faatino lea tulaga. Peitai o le saunoaga a le pelesetene le afioga Tagaloa Eddie Wilson, e lē faigofie ona o lea ua talosaga mai Ausetalia e avatu se mau faasaeinisi e faamaonia ai, e lē o toe aafia le talo a Samoa i le faama‘i lega lea sa faasaolo ma leaga uma ai tatou maumaga i tausaga ua tuanai.
O se isi lea o taumafaiga a le faalapotopotoga e faaopoopo i isi a latou fuafuaga mo le sailia o ni maketi i Ausetalia ma Niu Sila mo a tatou oloa gaosi ma fua o faatoaga. O le faaaliga o oloa e gaosia i Samoa a le SAME lea sa faatino i Niu Sila i le masina o Novema o le tausaga ua mavae, ua fua mai ni fua lelei e pei ona faailoa e le pelesetene.
“O le taimi nei o le tatou talo sa na o le 4 container i le masina ae e oo mai i le faaiuga o Tesema o le tausaga ua mavae atu nei ua 15 pusaoloa i le masina”. O se tulaga faafiafiaina lea mo le aufaifaatoaga talo auā a faaauau pea lea lelei, o le a toe tulai mai le talo i se tulaga sili ona tele sona sao ia tatou tupe maua mai oloa faatau i fafo.
O isi oloa e pei o le luau, apa peepee, ma le pia o le Vailima o loo lelei foi lona tulaga alumia i Niu Sila faapea Ausetalia ae o le faamoemoe o le SAME ia siitia pea manaoga o tagata i ia atunuu e faaaogā a tatou oloa.
O le masina o Mati e faia ai se faaaliga oloa a le faalapotopotoga i le pitonuu o Liverpool i Sini Ausetalia, lea o le a faalauiloa ai nisi o oloa gaosi a Samoa. O loo iai le talitonuga o le afioga Tagaloa Eddie Wilson, o le a tele nisi maketi e maua ai ma saga faatupu ai pea le alumia o oloa mai Samoa ae o le itu sili ona tāua, ia lelei ona tapena i ona vaega uma.
O le tasi lava lea o faafitauli o loo fai ma tuta‘ia ai tapenaga faapea pe a oo ina iai ni faaletonu. O le masina nei o le a mae‘a o Ianuari 2015 sa feiloai ai se aumalaga mai Samoa sa taitaia e le afioga i le Sui palemia o le minisita foi lea o fefaatauaiga Fonotoe Nuafesili Pierre Lauofo, ma nisi o le au faioloa i Ausetalia e faatalanoa le faamoemoe i le masina o Mati.
O le naunautaiga ia faatau lava e o tatou tagata i Niu Sila ma Ausetalia a tatou lava oloa ua masani ai e pei o le talo, peepee, luau, ma le avamalosi, ae lē faitaulia ai isi oloa o loo gaosia i le atunuu o loo mafai ona faatau atu i ia atunuu.
