Na matuai faafiafiaina le afioga i le Sea ma le ekalesia Metotisi a Bundamba i le faamanatuina o le 26 tausaga o le ekalesia i le Aso Toonai ua tuanai. O le ekalesia lea o loo tausia e le afioga i le Sea ia Rev Halefoti & faletua ia Seuoletoi Alainuuese.
Sa iai le fuafuaga e faamanatu le 25 tausaga o le ekalesia i le tausaga talu ai, peitai sa feagai ma le faaulufalega a le isi aulotu o le faasinoti, lea la sa lē faamanatuina ai lo latou 25 tausaga ae ua faamanatu ai loa i le tausaga lenei lo latou 26 tausaga.
Sa faatumulia le faamoemoe i le faasinoti ma le paia o le atunuu. O le fofoga o le aso o Pa‘ilua Samasoni o le sui failautusi a le ekalesia. O le tootoo o Leulumoega, le tofa ia Pasese Kilimasi Tiata (sui o le ekalesia) o ia sa feagai ma faaaloaloga.
O le fofoga o le atunuu ma le auvalaaulia o le tootoo o Asiata le tofa ia Faatoatoa Poamo. Sa faaleoina se faafetai auā le maau ma le milomilosia o le ekalesia.
Na matuai lagona le agaga faafetai o le ekalesia a le afioga i le Sea ia Rev Halefoti ma le faletua ia Seuoletoi Alainuuese i le seleni paia sa tauaaoina, e tusa ma le $217,327.55.
Na foi le gogo ma si ana i‘a i le tele o faalumaga ae sili ai ona fiafia auā e leai se gugulu ina ua to‘a le laualo i tapenaga faamalieloto a le faleaiga a le Uncle Sam’s Takeaway, tofa ia Poulava Sam ma Lona Matautia.
