O le tauvaga o le semi final a Kolisi mo le Tausaga 9 & 10 i le mataupu lea o le sipelaga o upu, sa faatinoina i le aso 14 o Aokuso i le Circa Theatre i Ueligitone. O lenei tauvaga na ofi atu i ai se alo o Samoa e tauva ai, le tamaitai o Lupe Aitogi-Paese, 14 tausaga mai le kolisi a Samuel Marsden. E 200 le aofai o tamaiti na filifilia mai aoga uma a Niu Sila e auai i lea tauvaga, ae fai lava tauvaga a itumalo taitasi. O Ueligitone e 60 tamaiti na tauva i le tauvaga faaitumalo o le semi final ina ua mae‘a ona faia filifiliga a aoga taitasi mo a latou tamaiti mo lea faamoemoe.
Na molimau le faiaoga o Lupe e faapea na o Lupe lava le tamaitiiti na mafai ona oo atu lona taumafai mo le tauvaga faaitumalo, ma o lea na o ia lava le sui mai le Kolisi o Samuel Marden i Whitby, Porirua. Sa faaalia e le faiaoga le susuga ia Suzanne Balasingham le faiaoga o le Igilisi i le kolisi o Samuel Marden, o ia faatoa galue i le aoga talu mai Aperila, ae na ia vaaia le galue lelei o Lupe i ana upu atoa ma lona lelei i mataupu o le aoga.
Na tauva Lupe e saili ai se toafā o tamaiti mai Ueligitone mo le tauvaga aoao, peitai e lei oo atu lona taumafai i le tulaga e moomia ona na iai isi upu e pei o le braggadocio e lei mafai ona sipela e le tamaitai, ae o lea ua toe sauni mo le tausaga fou ia fiti ai se laki.
Sa faaalia e Lupe e faapea o lona iloa i le manatuaina o upu e mafua mai i lona matauina o upu mai le faitauina o le Tusi Paia i taimi o tapuaiga i Aso Sa i lana ekalesia. O se mitamitaga sili lea i le ekalesia ona o ana tamafanau e lē misi le lotu i Aso Sa uma ma o lea ua maua mai ai le tali fiafia o le taumafai solo lelei. O le taimi muamua lea ua oo ai Lupe i ni tauvaga faaitumalo faapenei ma o le a ia taumafai malosi e toe tauva i le 2016.
O le tamaitai o Lupe e mai le afioga o Lalomanu ma Solosolo, ma e lolotu uma lo latou aiga i le PIPC i Porirua, lea o loo tiakono ai le tuaa o lona tina le Tofa ia Leupu Aitogi. E toaga tele Lupe i le lotu ma le autalavou Samoa a le ekalesia lea e malosi ai lana mafuta ma lona Nana le tausi ia Faioso Aitogi.
Faaalia e Lupe o lona taumafai e matuā lagolagoina tele e lona tina ia Faliu Aitogi ma lona aiga, ma sa ia faafetai ai i ona faiaoga ma lo latou fesoasoani aemaise lava le lagolago a lona tina ma mātua o lona tina faapea lona aiga ina ua fesiligia e le sui o le nusipepa o le Kapi Mana. O le Aso Sa analeila na faafetaia ai e le susuga i le faifeau ia Perema Leasi ma patipatia e le ekalesia atoa i le taimi o le sauniga le taumafai o Lupe, ma e tatalo foi mo le toe alo atu o lenei tamafanau a le ekalesia mo le tauvaga o le Spelling Bee o le 2016.
E momoli atu foi le faamalo a le tatou Sooatulau i le tamaitai ia Lupe e tusa o lona taumafai atu ma talia ai e uluai ulufale atu i nei tauvaga, ma ia manuia lou taumafai.
