O le susuga Tevaga Tafa Sililo 39 tausaga o le soifua o se tane na tulai i le faamasinoga maualuga i luma o le afioga i le Faamasino Sili Patu Tiavaasue Falefatu Sapolu, mo se faasalaga ina ua faamaonia lona moliaga o le faia o se faaoo manu‘a ise tina ua 52 tausaga o le soifua.
O lē ua molia ma lē na aafia sa auai i se mataupu a lo latou aiga sa fofogaina i le faamasinoga o Fanua ma Suafa i Mulinuu. O latou sa avea ma itu tetee i lea faamasinoga. O Oketopa o le tausaga ua mavae 2014 sa faia ai lea faamasinoga ma o le mataupu na fofogaina i le Aso Lua 14 o lea lava masina.
Ina ua toe tolopo le mataupu a le aiga ma ua tulai foi itu uma sa auai ma ulufafe ma le potu faamasino. E agai mai i fafo o loo tumutumu ai le tapuaiga a le afioaga o Levi Saleimoa lea sa lauga faafetai ai se tasi o matai o se maupaolo o le aiga o le tina na faia i ai le faaoolima.
Na valaau ane lē ua molia e alu ifo se isi tagata e lauga ae lē o le maupaolo, peitai na valaau atu i ai le uso matua o lē na aafia o se tina matua ua 72 tausaga o le soifua, e tapuni lona fofoga e lē o ia o se tagata mai Levi Saleimoa.
Na avea lea valaau ma mafuaaga o le toatamai ai loa o lē na molia ma savali atu i le tina matua ma faafua sana gaioiga o le a faia i ai. Na iloa atu e le tina 55 tausaga le uso o le tina 72 tausaga le matua ma ia savali atu ai loa ma tulei ese lē na molia. O se gaioiga na ita tele ai Tevaga ma ia sasau ai loa lona lima ma tu‘i le fofoga o le tina 55 tausaga lea na tafe toto mai ma faanatinati ai loa i le falemai i le taeao lava lea.
Sa faia ni togafitiga a fomai ma iloa ai ua faaletou nifo e lua o le tina ma aveesea ai loa. O aafiaga o lē na faia i ai le faaoolima e ogaoga ona na faaalia e le faamasinoga, talu lava ona oese ona nifo e lua ua lē o toe lelei ona lamu ana meaai, ma ua tiga foi le vaega pito i lalo i le itu tauagavale o lona auvae.
O le isi itu na faaalia e le faamasinoga o loo lagona pea e le aiga o le tina le loto tiga i lē ua molia ona o lana gaioiga na faia. O lē ua molia o se tagata na ia tuua le aoga i le vasega tausaga 12 ma faapea ona auai i se aoga Tusi Paia a le Ekalesia Assembly of God poo le AOG i Amerika Samoa.
O le tausaga e 1998 na foi ane ai i Samoa ma amata sana lava lotu na faaigoa o le New Assembly of God. O le tausaga e 2000 na toe foi ai i Amerika Samoa ma faiaoga i le Kolisi faafaifeau a le ekalesia, ae na toe taliu i Samoa ma faaauau ai ona faiaoga i le Kolisi Tusi Paia a le ekalesia.
O ia ose tagata e faatupuina le filemu e pei ona molimau lona tina i le faamasinoga, ma o le faatoa molia foi lea i se solitulafono.
Peitai o le silasila a le faamasinoga e ogaoga tele lana solitulafono ona o aafiaga o lē na faatino i ai le faaoolima.
O le isi itu matuia o le mamao o le eseese o tausaga o lē ua molia ma lē na aafia e 13 e va ai.
O lē ua molia o se tagata e sili ona malosi pe a faatusa i lē na aafia o se tamaitai. O itu lelei mo Tevaga o se tagata e lelei le amio a o lei molia, ma le isi na vave ona ioe i le solitulafono na ia faia.
O le silasila a le faamasinoga o se moliaga e lei mafaufauina e tupu, ae na mafua ona faatino e lē ua molia le gaioiga ona ua valaau ane le uso matua o lē na aafia e tapuni le gutu ma aua le aiā atu fua e lē o ia o se Levi.
O le faaiuga ua taunuu i ai se finagalo o le faamasinoga, e $300 le sala tupe ma le tuutuuga e tatau ona totogi uma i totonu o le fitu aso. E 3 masina e alu ai i le falepuipui pe a lē usitaia le faaiuga.
