“Faatoa ou talitonu lava ile lelei o polofiti ale Polenisia ina ua iai se isi kamupani vaalele la te tauva”
Ina ua lē toe iai ni malaga ile va o Apia ma Pago Pago ale kamupani vaalele mai Amerika Samoa ole Interisland Airways, na faaloloto ai lava na ole Polenisia ile faia o malaga ile va o Samoa e lua. Ose tautua na faaletonu ile tuai ole feaveaiina o pasese ma uta ina ua aafia nisi o vaalele laiti ale Polenisia ini faaletonu ma tuai ai.
Ole vaitaimi ole fono ale Koneferenisi ale ekalesia Metotisi ile masina o Iulai na molimauina ai ia faaletonu. O lea la ua iai nei se isi kamupani vaalele fou le Talofa Airways ua umia ele susuga Jeffrey male faletua o Maria Hunter faapea le susuga Tauā Fatu Tielu ma lona faletua, ole a toe maua ai se tauvaga ile feaveaiina o pasese ma uta ile va o Samoa ma Amerika Samoa.
Ole luitau tāua lea ile Polenisia le kamupani vaalele oloo faatupe ele Malo ona ole a saili nei nisi auala e faafetaui ai se tautua ole a faia ele Talofa Airways. O lea ua iai pasese pa‘ū a lea kamupani vaalele ma ua oso mai ai foi i totonu ma ni pasese pa‘ū ale Polenisia.
Faaalia ele afioga ile Palemia ile faalauiloaina ole Talofa Airways o polofiti ale Polenisia sa ia faailoa ile alii pule sa iai ole kamupani vaalele le susuga Tauā Fatu Tielu lea ua pulea nei tupe ale Talofa Airways, e lē mafai ona ia talitonuina seia vagana ua iai se isi kamupani vaalele e tauva ma le Polenisia.
O lana lu‘i foi lea na ave ile alii pule ua iai nei ole Polenisia. Ole isi itu tāua na faailoa ele Palemia e tatau ona nofouta iai le Talofa Airways ole mau aitalafu ale Polenisia sa iai i tausaga ua mavae, ma e tatau ona aloalo ese ai. O malaga a aulotu ma nuu e faaaitalafu pasese ose isi lea mafuaaga o aitalafu na aafia ai le Polenisia a‘o faia ana malaga i lona vaalele Jet e tasi sa iai.
Ole faagaioia ole Talofa Airways na faaalia ele alii pule sili o ia foi ose pailate le susuga Jeffrey Hunter, ole a tasi lana malaga ile taeao mai Faleolo agai i Pago Pago ae o isi malaga uma ole aso e faia mai Fagalii.
O lana malaga mulimuli mai Pago Pago ole a agai i Faleolo. E lua ona vaalele e iva le pasese, ma ose vaa laitiiti e na ole toatasi le pailate. Oloo iai le fuafuaga e tatau ona faia isi ana malaga ile va o Apia ma Vava‘u i Tonga a‘o lei mae‘a le tausaga nei.
Ole a fetaui lelei lea alavaa male toatele o tagata Tonga oloo aumau ma nonofo i Amerika Samoa.
