Vave le moomia o le tautua a le UTOs mai NZ

O se fiafiaga i le pulega o le ofisa o tupe teu faatausi mavaega le UTOs poo le Unit Trust of Samoa, ona e lei fia ni vaiaso talu ona tatala lana faigapaaga ma le kamupani lafo tupe faamomoli o le Pacific Ezy Money Transfer mo le auina mai i Samoa o seleni a nisi o le atunuu o loo fia teu faafaigaluega, ae ua silia i le tolusefulu i latou ua lesitala ma faamauina a latou teugatupe.
I se pepa o faamatalaga mai le pulega o le Pacific Ezy Money Transfer ua faaalia ai e le alii pule le afioga Muliagatele Faimalo Allan Stowers, o lea ua faatoa lua vaiaso o le faiga paaga ae ua toatele le atunuu ua valaau atu mo ni faamatalaga atili e malamalama ai i le autū o le faamoemoe.
Ua amata ona faagasolo faatalanoaga i le leitio mo lenei lava fuafuaga ae na amata lava i ni semina sa tapenaina e le kamupani lafo tupe faamomoli. Failoa e le afioga Muliagatele ua amatamea lana kamupani i le lesitala uma o ana tagata faigaluega i Niu Sila ma Samoa ae ua iai foi nisi o ekalesia ma faatasiga a aiga potopoto i Niu Sila ua sauni atu foi e fia faia ni teugatupe.
O le itu aogā ma tāua i le faamoemoe lenei o le Malo e ala i le UTOs e pei ona faaalia e le taitai o le Malo i le alii Palemia, ona e tua i ai aiga i Samoa ma atunuu i fafo i taimi e malaga mai ai i le atunuu i ni faalavelave poo isi fuafuaga tau atiinae a aiga ma nuu faapea ekalesia, ae o lea e faigofie ona oo atu i le atunuu ae o loo iai se seleni e tua atu i ai.