
Ole vaiaso lenei na toe foi ai le Legends ile malo; ae faaauau pea le leai ose faia’ina ale Eels, na malo le Eagles ile Knights ae fuamoa le taumafai ale Warrior ile faaiuga o taaloga e fa ole Super IX ile vaiaso lona fitu.
Talofa e, ile Warriors na talimalo ile Chiefs i lona malae i Palauli. E lei iai ma sona ‘ai na maua e mamao le malo ole ‘au mai Aana e 41-0. Ole ‘au pito sili lea ona faaletonu ole Super IX.
E oo foi ile taaloga ale U20s ale Warriors ma le U20s ale Chiefs, e na’o le tolu ‘ai ale Warriors na maua ile 36 ale Chiefs. O lona uiga, mai taaloga e lua, e 77 ‘ai ale Chiefs na maua ile na’o le 3 ale Warriors.
E ui ina faigata le atinaeina ole Super IX aemaise le tulaga oloo iai le lakapi i lea itu ole motu tele i Salafai, ae oloo taumafai pea le Iuni Lakapi e faaauau le taamilosaga fou mo le ata lautele ole atinae lea ole taaloga i totonu ole atunuu.
Oloo tauave toatasi ai ele Warriors le uli ole taamilosaga ile na’o le 3 o ‘ai. Faatusa lea ile 28 o ‘ai oloo nofo ma le Eels lea e numera tasi.
Ae na laki le Eels ile Aso Toonai. Na malag atu le ‘au a Vaimauga ma Apia e asiasi atu ile isi itu ole motu, ae sola mai ai ma le manumalo ile Navigators 36-33. Toeitiiti lava faia’ina le Eels i lana taaloga. Ae e lei faapea le taaloga ale U20s, na titina ele Navigators le U20s ale Eels, 56-13.
Na lamalama ele Legends le Vikings a Savaii i Sisifo lea na la feiloai i Apia Park ile Aso Toonai. Ose taaloga mataina a ‘au ia e lua. Ae e faaiu ane le taaloga e sili ‘ai ole Legends 28-21 ale Vikings.
O ‘au e lua a Faleata ma Tuamasaga na tauva ile malae a Malisi i Lotopa. Sola ai le Eagles a Tuamasaga ma le manumalo 26-15 ale Knights.
Taaloga ole vaiaso fou – Vaiaso 8
Ole vaiaso fou ole a leai ai se taaloga ale Super IX i Salafai aua ole a malaga ana ‘au e lua, le Warriors ma le Vikings. Ole a talimalo le Navigators ile Warriors i Apia Park. Ole malaga lona lua lea ale Warriors ole taamilosaga.
Ole isi ‘au a Savaii, le Vikings ole a malaga i Falealili e fetaui ma le Southern Tornadoes. Ole Knights ma le Chiefs e feiloai i Lotopa ile malae a Malisi, a’o le Legends ole a taumafai e taofia le sosolo ale Eels. O lea taaloga ole a faia lea i Samusu.
Faaiuga o taaloga vaiaso 8
Legends 28-21 Vikings
Navigators 33-36 Eels
Warriors 0-41 Chiefs
Knights 15-26 Eagles
Southern Tornadoes 0
Taaloga ole vaiaso fou
Legends vs Eels
Southern Tornadoes vs Vikings
Navigators vs Warriors
Knights vs Chiefs
Eagles Bye
Au ole Super IX
Legends, Aleipata, Anoamaa, Atua i Saute
Eels, Vaimauga
Knights, Faleata
Eagles, Tuamasaga
Chiefs, Aiga ile Tai, ma uta
Southern Tornadoes, Siumu ma Falealili
Navigators, Lefaga ma Safata
Vikings, Savaii i Sasae Salelologa i Aopo
Warriors, Savaii i Sisifo, Palauli i Asau