Ua mae‘a le fono tele a le Ekalesia Faapotopotoga Kerisiano Samoa ae ua manino le tele o faitioga na laga i aso o le fono tele e faatatau i le Televise a le EFKS poo le EFKS TV.
O se galuega na tatala i le tausaga na tea nei ma o lea e lei atoa le tausaga talu ona faavae mai ae o le sau a faitioga a sui usufono o le Me e faatatau i le faatautaiga o lenei atinae a le Ekalesia, e foliga mai ua leva ona iai le manaoga o nisi o le ekalesia e amata loa le televise amata loa foi ona sau i totonu o le tupe maua.
O le tulaga e pei ona iai le uluai tausaga e pei ona saunoa le susuga i le failautusi aoao o le ekalesia, Rev. Dr Iutisone Salevao, e tatau lava ona vaavaai i le tupe e alu i ia atinae ma e leai se pisinisi e amata loa ona maua lea o se tupe faasili, o le tele o pisinisi na ia ta‘ua e tai lua i le tai lima tausaga ona faatoa vaaia lea o se tupe faasili e maua mai ai.
O le tau o le faataatiaga o pou ina ia tele le vaega o le atunuu e maua mai faasalalauga a le EFKS TV, o le faatauga o masini pue ata, masini e faasoa ma faaleleia ai le leo, o masini tau satelite, o masini e tuufaatasi ai ata ma polokalame, e manino le taugata ma o se vaega tele lea o le tupe alu a le ekalesia i lenei atinae i le taimi lenei.
O le tupe foi e faaalu i le uluai tausaga e pei ona faalauiloa ina ua tatala lenei televise, o le tupe lea mai i le Fono Aoao a le Lotu i le Lalolagi. A mae‘a le tausaga, o le tuutuuga lea ua tatau loa ona maua se seleni a le televise lava ia e faatino ai ana galuega ma fuafuaga i le agai i luma.
O le televise lenei na faatūina i le manaoga o le ekalesia e unai ana tala‘iga ma ana foi galuega faatino i totonu o Samoa. O se auala ua fesootai ai le ekalesia ma ona sui lotu, ma o se auala foi ua mafai ona tagai i ai le Ekalesia e maua ai se seleni i ana atinae.
Na umi se taimi o faia suesuega i le mafai ai ona faatino lenei galuega ma o le taimi lenei o loo ua faatamoe le televise pei lava o le TVONE ma le TV3 i totonu o le atunuu o ni televise o loo faamoemoe i faasalalauga faapisinisi e faalautele ma faaauau ai ona faasalalau.
O isi alāata a le Katoliko, le Ekalesia a Iesu Keriso o le Au Paia o Aso e Gata Ai, o le TV a le Ekalesia Aso Fitu o le Toe Afio Mai ma le KTV poo le Kingdom TV a le Nofoaga Tutotonu o Tapuaiga le Worship Center, o loo patino lava televise lotu ia ia latou tapuaiga ma polokalame a le lotu, ae o le EFKS TV ua aofia ai ma polokalame e pei ona faaalia foi i le TVONE ma le TV3.
O le suiga tele la lea ua faia talu mai le mae‘a o le fono tele o le faaitiitia o le numera o tagata faigaluega lea na tuu mai le numera i le tausaga muamua ua oo atu i le to‘a 47 ae e to‘a 19 ia ua ta‘ua ua aveese nei ae tuu lava na o i latou ua manatu le pulega o le televise ua moomia ma talafeagai ma lenei taumafaiga e faasao ni seleni o iai a le EFKS TV. O le tulaga mālie la o lenei mataupu ona o le toatele o loo galulue i lea nofoaga, atonu o lea o le a agai i ai le vāea a le Ekalesia o i latou na avatu lava i totonu e faafeagaiga o o latou falesa eseese mo ni avanoa faigaluega.
