Auē ua nuti le kate faapelepele ma ua motu le avei ma le faasolo taugata, ma ua tagi auē ai nei Rasela ma le aiga, faapea uo ma ē masani ua tuua nei i faanoanoaga ona o le toesea faafuaseia o le tamā, uso, tuagane ma le uo peleina. Ua moni ai le Salamo 30:5 “Aua o lona to‘asa o le emo o le mata lea, a o lona alofa tunoa o le ola lava lea, e afe ane le tagi i le afiafi a o le alaga fiafia i le taeao”.
O le aso 6 o Ianuari na valaauina ai faafuasei e le Atua le fetalaiga ia Liufau Teumalo Luteru Tanielu i lona lava aiga i Vaitele i Samoa. O lenei tamaalii o le atunuu sa alala i Ueligitone mo le sailiga o lona faailoga o le Bachelor of Engineer (Civil) mo le tolu tausaga ma na faaiuina ana taumafaiga i le faaiuga o le 2013, ma toe foi ai i Samoa e faamoemoe e toe taliu mo lona faauuga, peitai ina ua taunuu i Samoa ma toe amata ona faigaluega i lana galuega (Civil Engineer Consultant) i nai vaiaso e fā, peitai na oso faafuasei lona gasegase ma sii atu i Matootua i le aso lava lea ma maliu ai lava.
Na aoaoina i Papua New Guinea i le University of Technology maua ai le Dip. Survey ma galue ai i Samoa o se Fuafanua. Na toe taliu mai i Niu Sila ma aoga i le Wellington Polytecnic i le 1992 maua ai lona tusipasi (NZCE Civil). O lea na toe foi i Samoa ma tautua ai i le Ofisa o Galuega faataitai (Manager) i ni tausaga ona toe taliu mai ai lea e aoga i le Open Polytechnic (NZ) ma Southen Queensland University (Australia) mo lona faailoga (BE Civil) ma iu ai i le 2013.
E usufono le fetalaiga ia Liufau Teumalo Luteru Tanielu o tautua i le atunuu i Samoa i le galuega o se Civil Engineer Consultant i le matagaluega o Samoa Ports Authority.
O se tamaalii faamoemoeina o le atunuu i le tulaga faainisinia (Civil) ma sa ia tusia foi ata mo le galuega o le uafu i Matautu e pei ona iai nei i le taulaga o Apia. E tele ni matagaluega o le malo sa galue ai faapea foi le kamupani a Ah Liki Construction sa galue ai o se Site Engineer ma Bellingham Marina (NZ) sa galue ai o se pule (Project Manager/Civil Engineer Divisional Manager) o le Samoa Ports Authority i le 2006 – 2007. Ina ua toe foi i Samoa i le mae‘a ai o aoaoga mo lona faailoga, sa toe galue ai i lana galuega lava lea (Civil Engineer Consultant) mai le 2013 seia oo ia Ianuari 2014.
O ona mātua o Rev. Laau Ioata Tanielu o Saleaula ma Safotu ma Moevasa Lealiifano Tanielu o Asau ma Auala. O ia o le uii o tama mai le fanau e toasefulufitu. E 52 ona tausaga ae na faaipoipo atu ia Fetoloai Afele Tanielu ma e toatasi si o la alo le alii o Luteru Jr.
E iu nei lona soifua o avea ma sui (Technical Member) o le Institute o Professional Engineers o Niu Sila (TIPENZ) ma o le sui foi o le Aufuafanua o Niu Sila: Associate Member of the Institute of Surveyors of New Zealand (AMISNZ).
E tele faamoemoega o lana galuega sa ia fuafuaina mo le lumanai faapea foi lona aiga peitai ua lē ogatasi le Futia ma le Umele e pei o lea fuaitau a Samoa. E pule pea le Atua ma lana faasoasoa mai i lo tatou ola ma le soifua o soo se tagata.
E momoli tele atu faamaisega i le tina ia Fetoloai ma Luteru Jr faapea le aiga atoa faanoanoa.