E moomia ma manaomia le galulue o tagata uma mai lava i le Malo e oo i ekalesia, ma pulega mamalu a alii ma faipule o nuu ma afioaga, e tafiesea ma taofia soligatulafono tau feusuaiga fai faamalosi, ua aafia ai le ola mu‘amu‘a o fanau ma tamaitai.
O se feau taua lea ua faatalauula mai ai le faatamā o le faalapotopotoga o le Toomaga o Tagata Puapuagatia, le afioga i le alii minisita, Tuisugaletaua Sofara Aveau i le faalauiloaina ai o le polokalame a lea faalapotopotoga, ua autu i le tineia o ia ituaiga o sauaga ma soligatulafono.
O le afioga i le Faamasino Sili, Patu Tiavaasue Falefatu Maka Sapolu, na ia fofogaina le saunoaga autu o le amatalia o le polokalame, lea na ia tuusao ai le feau, ina ia silafia e tagata uma le matuitui tiga o aafiaga o nei soligatulafono, aemaise o le matuia tele i le silasila ma le vaai a le tulafono. O le saunoaga lava a le Faamasino Sili na ia ta‘ua ai le tāua o le faalauiloa o lenei faafitauli, ina ia mafai ona silafia e tagata uma ma sailia ai se fofo.
O le sauniga na amata aloaia ai le polokalame a le Toomaga o Tagata puapuagatia sa auai atu i ai le afioga i le Masiofo a le Ao Mamalu o le Malo, Filifilia Tamasese, o le alii Palemia, minisita o le kapeneta ma le mamalu eseese o le atunuu sa auai e pei o pulenuu, sui o komiti a tina ma tamaitai, ma faiaoga o aoga eseeese i le atunuu, lea o le a amata ai ona faatino le polokalame e ala i ni faatalatalanoaga ma aoaoga.
Ua faaalia e le faatamā o le Toomaga o Tagata Puapuagatia, le afioga i le minisita o galuega tetele a le Malo, Tuisugaletaua Sofara Aveau, o le a oo atu foi i nuu ma afioaga e pei ona saunoa le faatamā o le faalapotopotoga
