O le tausaga e 1993 na faatoa faatu ai se televise i totonu o Samoa. O le televise Samoa lea na faaigoaina ai ma e silia i le 10 tausaga ona pau lava lea o le televise a le Malo na maua ai faasalalauga faapea.
O le taimi lenei ua fitu televise i Samoa ma e leai ma se televise o toe i lalo o le vaaiga a le Malo ae ua umia saoloto uma.
O se atinae aupito vave tele lea i totonu o le atunuu i le tele o nei ofisa faasalalau ma ua maualuga ai foi le manaoga mo i latou e faatinoina galuega faatelevise peitai o le utiuti o le numera o i latou e galulue i nei falefaigaluega, ua avea ma auala e faigata ai le agai o tagata faigaluega mo aoaoga auā le faalautele ai o le tomai.
O le faaiuga o le tausaga na tea nei na maua ai se fesoasoani mai i le ofisa o Amerika i Samoa ina ia faatino ai e le kamupani o polokalame tau televise o le WT MEDIA i Apia, e faatino ai ni aoaoga ina ua talosagaina e le alii e ana lea ofisa, ia Rudy Bartley se aoaoga.
O le mau a lenei alii, e tele tomai ua vaaia i aoaoga e pei o le aoga tusitala ae o le isi vaega tāua lava o lenei auaunaga e lē o maua ai ni aoaoga o le pueata, o le tuufaatasia o polokalame i luga o masini computers, ma le faaleleia o le tomai tau inisinia o leo ma moli.
O nei tomai uma na faaofi uma lava i le aoaoga lenei ma o le vaiaso lea na tea nei na faamae‘a ai i se tufatufaga o tusipasi mo sui o televise uma i le atunuu, faapea le vaega o ata ma polokalame a le Iunivesite Aoao o Samoa.
O le tamaitai o loo faauluulu i ai le ofisa o Amerika i Samoa nei ia Angelina Wilkinson sa tauaaoina atu tusipasi mo pueata, o tusitala, o tagata faasalalau, inisinia o leo ma i latou e tuufaatasia ata i luga o masini computers (online editors).
O i latou ia na auai i lenei aoaoga i le tausaga ua tea.
O se taumafaiga ua talosagaina nei le malo o Amerika ina ia faaauau le faatinoga ona talu ai o le pisi tele o i latou nei e faigata ai lava ona maua avanoa e umi ai aoaoga e mafai ona auai atu i ai.
O le faigata foi lea ona agai i fafo e faatino ia aoaoga ona o le taimi lava o loo mafai ona toesea ai ma galuega, ae o le faatino i Samoa o nei taumafaiga ua ioe le toatele sa i lea aoaoga e faamalosia ai lava le agai i aoaoga nei ma e mafai foi ona fesootai pea ma le WT Media i le faaauau ai o le fesoasoani moomia.
O le faafetai lea a sui na auai ona o le mafai e Amerika ona lagolagoina lenei taumafaiga. O le mau a lea tamaitai e tatau lava ona manino tagata uma o Samoa faapea isi atunuu o loo galulue i le atunuu, i le tāua o le fesootaiga ma ofisa faasalalau aemaise i le faalauiloa ai o a latou fesoasoani, o a latou atinae ma le toe lipotia o nei galuega i malo tetele o loo galulue ai foi i latou.E le gata i lea o le sao o televise i le momoli vave o faamatalaga ma tala fou o se itu tāua tele lea i le atinae lautele o Samoa.
O le lelei ona saunia o tagata faigaluega na ta‘ua e sui auai o le auga atoa lava lea o ia auaunaga ma a lelei atoatoa faamatalaga ma le tuufaatasiga o ata ma le leo, ua mafai ona laalaa i luma le tautua ua ofo atu i le atunuu i aso taitasi. O le afioga Galumalemana Faiesea Matafeo, ma Verona Parker o pule ia o fale televise tetele i le atunuu TV1 ma le TV3 na auai uma e molimauina lenei laasga ua agai i ai fale televise i totonu o le atunuu.
