Na faamatala e Robert Newman Chong Nee i leoleo e faapea, o Shane Chan Tong na tapenaina uma le osofaiga na gaoia ai tupe a le lala o le Westpac Bank i Vaitele-tai i le tau amataga o Aperila o le tausaga nei 2010. Fai mai le faamatalaga a le alii, o le taavale a Shane na faatino ai le gaoiga.
O ia foi na saunia aupega e pei o le fana meataalo ma le agaese atoa ai ma lavalava na fai ai a latou teuga e ufiufi o latou foliga pei ni Ninja e masani ona vaaia i ata tifaga.
Na faamatala foi Robert ina ua malaga ane i le taavale a Shane sa tu i se vaivao e leai ni tagata e nonofo ai, ae sui uma o latou lavalava, ma tatala ese ai le numera o le laisene poo le number plate.
Peitai na faaalia e le Faamasino Sili, afioga Patu Tiavaasu‘e Falefatu Maka Sapolu, i le tolaulauina o lana faaiuga faasaga ia Robert, e ono lē talitonuina lana faamatalaga na fai i leoleo ona ua maliu Shane Chan Tong, o se tasi o i latou e toafā na molia e leoleo i le faia o le gaoiga.
O le masina na tea nei na amata ai ona suesueina molimau a leoleo faasaga ia Robert ma Faiga Victor Tanielu sa teena moliaga o le faomea ma le umia o ni aupega matautia. Peitai na alualu le faamasinoga, suia le tetee a Robert i lona ioeina o moliaga.
Ona o faiga masani a le faamasinoga pe a toe suia se tali a sē o molia, e fai muamua le faaiuga mo lē ua ioe, ona faato‘ā faaauau ai lea ona suesue moliaga o se isi tagata o loo tuuaia faatasi i se solitulafono.
O le Aso Lua ua mavae, 19 o Oketopa 2010 na faato‘ā tolaulau ai le faaiuga a le faamasinoga mo Robert Chong Nee lea ua faasalaina ai i le ono tausaga ma le ono masina i le falepuipui.
O lona uso matua o Nazario Chong Nee na faasalaina i le masina o Iulai 2010 ina ua ioeina moliaga o le faomea mo le umi e 6 tausaga.
Ua toesea uma i o la faasalaga le vaitaimi umi pe fitu masina sa nofo taofia ai i le vaaiga a leoleo.
Ua malilie uma i laua e lagolago i le itu a leoleo i le faamasinoina o le isi taulealea o Faiga Victor Tanielu o loo tetee.
O se itu lelei lea mo Robert i le silasila a le faamasinoga i se faaiuga mo ia, aemaise o se itu lelei foi lona ioeina o moliaga e ui na tuai ona ia faauluina lea tali. Na saunoa le faamasino sili i le matuiā tele o le solitulafono na aafia ai lea taulealea auā o se taimi muamua ua tupu ai se gaoiga o se faletupe i Samoa.
O Robert sa alu i Niu Sila ina ua faato‘ā fitu ona tausaga ma ola a‘e ai i le tele o tausaga.
E faapea foi lona uso matua o Nazario. Peitai na toe tipoti mai uma i laua i Samoa ona o moliaga faasolitulafono sa aafia ai i Niu Sila.
O ia solitulafono e aofia ai le gaoi ma le talepe fale ma le gaoi taavale.
