E ui i se faatofalagaiga na a‘e i le afioga i le alii pule o le faletaavale o le G-Mana le afioga ia Galumalemana ma le pulega e ala i se tauvaga pese mo le fanau ua faaigoaina The Voice, ae sa maitauina ai i lea aso le malosi o le lagolago a mātua e ala lea i le taupati atu e faafofoga ma maimoa le taumafaiga a le fanau i totonu o le lotoā a le G-Mana i Otahuhu.
O se polokalame e tasi le vaiaso na fuafuaina ai ina ua tuua aoga a le fanau, ae sa lē faavaivai ai le finau a mātua e lesitala suafa o o latou alo auā lenei tauvaga. E lei umi se taimi na tatala ai le avanoa mo fanau ae latalata i le 100 tamaiti ua mafai ona faatoai mai, ma o lea sa vave ai ona tapunia avanoa ina ia faafaigofie ona vaevae tamaiti i vaega e tolu ua fuafuaina mo le tauvaga.
O le Vaega Muamua o le 5 tausaga agai i le 7 tausaga, e 20 fanau sa tauva ai. Vaega Lua o le 9 tausaga agai i le 12 tausaga, e 20 foi fanau sa tauva ai. Ma le Vaega Tolu o le 13 tausaga agai i le 17 tausaga, e 25 i latou sa tauva ai. O lenei polokalame sa tatala le avanoa e pule ai le tamaitiiti i se pese e tapena i ai ae na o le 2 minute le umi.
O le taeao o le Aso Toonai i le ta o le 9 o se taeao ese lea i totonu o le lotoā a le G-Mana i le tatala ane o le lotoā ua leva ona kiu mātua ma fanau i fafo ua agai atu, e fia faafofoga i le tauvaga pese poo ai le fetu pupula o le a sola ma le faailoga tupe e $300.00, auā sa lesitala fua uma tamaiti.
O le afioga i le sui ao o le malo o Samoa ia Tuimalealiifano Vaaletoa Sualauvi II ma lana masiofo faapea le afioga i le Konesula o Samoa ia Faolotoi Reupena Pogi sa fai ma malo faaaloalogia e molimauina taumafaiga a le fanau.
Na tatala lenei polokalame i le tatalo e le afioga ia Patele Pio Galumalemana, ma saunoa ai loa le fofoga o le aso le afioga ia Tuigamala Titiula e faafeiloai le paia ma le mamalu o Samoa potopoto.
O susuga i faamasino o se tasi o alo pese lauiloa o le atunuu le susuga ia Vaniah Toloa, le tamaitai Tonga ia Mele faapea le alo e faasino i le alii Pule ia Galumalemana Tai Galumalemana le tamaitai ia Princess Maryann Galumalemana.
O fanau mai Tonga, Niue faapea Samoa sa auai i lenei faamoemoe. Ae ui i le eseese o atunuu ma gagana ae sa maitauina le tasi o fanau i totonu o le G-Mana ina ua faagasolo le polokalame.
O pese faaleagaga, o pese faasalemausau ua sui ai lagona o lea aso ina ua faailoa ma lalaga le meaalofa ma le taleni sa taotaomia a le fanau.
Sa mau pea le toovae i le tapuaiga a mātua a o alo faiva o latou alo i le tauvaga, a o nisi o mātua sa matuā masii lelei atu ma le piano ma kitara e faailoa ai lo latou lagolago i pese a fanau. Sa fai ma vavae foe o le aso i vaitaumafa faapea ma le taumafataga i le BBQ na saunia lava e le aufaigaluega.
O vaega uma e tolu o le tauvaga sa fai agai i le Top 5 e maua faailoga tupe ma le CD, a o isi e i lalo ifo e maua uma latou seleni e $20 a le tamaitiiti e tusa lava poo le aufaipese toalua pe toatolu sa faamalieina uma lava le fanau.
O iuga la nei o le tauvaga i ona vaega e tolu:
Vaega Muamua (5 tausaga – 8 tausaga)
1st Zephaniah Matafai – $300.00
2nd Luisa Lemi – $200.00
3rd Sieni Maka – $100.00
4th Henry Cocker – CD
5th Lesina & Amos – CD
Group Lua (9 tausaga – 12 tausaga)
1st JD & Kimi – $300.00 (Team mai Niue)
2nd Williams Sisters – $200.00
3rd Alisa Ifi – $100.00
4th Margaret Lee Hang – CD
5th Easter Petone – CD
Group Tolu (13 tausaga – 17 tausaga)
1st Raymah Matafai – $300.00
2nd Tinei Leniu – $200.00
3rd RJ & Ingrid Ioka – $100.00
4th Siana Iakopo – CD
5th Norman Liaina – CD
Ae faaalia le agaga fiafia ma le agaga faafetai o le susuga ia Vaniah Toloa i le susuga i le alii pule ia Galumalemana Tai Galumalemana ona o lenei polokalame ua aliae ai le tele o le taleni pese ma le taleni ta laau o loo nonofo ma tamaiti, ma lana tuualalo i mātua ma fanau ia faaaogā tatau le meaalofa ua tuuina mai e le Atua.
