Ua filifilia le tamaitai pese Samoa mai Samoa o Leitualasa Patu, e avea o se tasi o tamaitai tauva mo le polokalame fou a le televise lua a Niu Sila.
O le tamaitai o Leitualasa, o se tasi o fetu pupula o le tauvaga sa faatautaia e le leitio a le atunuu le 2AP, ma sa filifilia ai foi i le toa sefulu aupito i luga o lea lava polokamale.
O le masina na tea nei o Novema, sa malaga ai i Niu Sila i se malaga faapitoa sa tapenaina lava e le komiti o le Star Search a Samoa, mo se faafiafiaga tele sa faia ai.
O le auga ma le autū o lea faamoemoe, o le taumafai lava e atina‘e ma saga faaleleia pea le taleni pese, atoa ai ma se fesoasoani tau seleni mo i latou.
O le malaga lea na maua ai ma le avanoa e le polokalame fou a le Televise Lua a Niu Sila e avea ai o se tasi o tamaitai tauva mo le uluai taimi o lea foi polokalame i luga o le televise.
O Leitualasa e toafā ia i latou o talavaou o le a faia i ai se filifiliga faalauaitele a tagata maimoa, mo se tasi o le a manumaloina ni faailoga tupe, faatasi ai ma se konekarate mo le pueina o musika ma pese.
O le aso o le tausaga fou aso muamua o Ianuari 2012 o le a silasila ma maimoa ai le mamalu o Niu Sila atoa i lea polokalame mo le taimi muamua.
O le itula e sefulu i le taeao o le aso tonu o le tausaga fou, o le a faasalalauina ai i luga o le Televise Lua, ma maimoaina ai lea foi alo o le atunuu, na malaga mai Samoa.
O le polokalame fou e faaigoaina o le FRESH, First Pacific Youth, o loo taiulu i le tamaitai o Lisa Taouma, o se tasi foi o alo o le atunuu, na filifilia le tamaitai o Leitualasa mo lea foi tauvaga.
Na faaalia foi le agaga fiafia tele o le afioga ia Tofilau Esther Lakisa-Taito o se tasi sa fesoasoani malosi mo le faalauiloaina o lea tamatai pese a le atunuu, ona o le avanoa ma le tulaga ua maua ma oo i ai le taumafai o le tamaitai mai Samoa.
Lisa Taouma (Fresh Programme Producer for TV2, First Pacific Youth)Na saunoa Lisa e faapea, sa fiafia lava e tuuavanoa i le tamaitai mai Samoa, talu ai o le matagofie tele o lona siufofoga, aemaise ai o se avanoa lelei tele mo ia e fesoasoani ai i lana taleni. Sa faailoa foi e Lisa e faapea o le polokalame a le TV2, o se polokalame fou faato‘ā amata ma o se fiafiaga sili foi lea o ia, ona ua amata mea ai se tamaitai Samoa o loo nofo i Samoa, mo lana plokalame sa fuafua mai. O loo maualuga le manatu o Lisa e tatau ona manumalo le tamaitai o Leitualasa i le tulaga muamua mo lea foi tauvaga. Ua mae‘a lava ona faaleoina le pese a le tamaitai pese i luma o faamasino, ma sa matuā aafia ai lagona o se tasi o tamaitai faamasino i le pese na usuina e Leitu.
O le aso muamua o le masina muamua o le tausaga fou 2012, i le itula e sefulu i le taeao, ua faamoemoe o le a silasila ai le mamalu o tagata Niu Sila i lea foi polokalame fou i luga o le Televise Lua.
E faamoemoe lē o le a manumalo i le palota a tagata lautele e pei ona faataunuuina foi i isi polokalame faapea o loo faagasolo i luga o televise. O loo unai malosi ai tagata Samoa uma ina ia maimoaina lea polokalame, ma fai le palota mo le tamaitai o Leitualasa Patu ina ia manumalo ai. O se tulaga o le a fesoasoani ai foi mo lona taumafai, aemaise lava o le itu tau seleni, faapea ai se konekarate ofoina fua mo le pueina o ana pese mo le lumanai.
