Uluai faauuga Aoga Faa-faifeau SAGNZ i Aukilani

Auā o le faamoemoe ua taunuu o le laau o le soifua lea, a o le fetalaiga a Iesu i ona soo, “Ia outou o atu e tala‘i atu le tala lelei i tagata ma ia fai ai nuu uma lava ma soo”. O se faamoemoe foi a matagofie ona tapenaga, o se polokalame foi na matuā maoae lona faataunuuina ae o se fuafuaga na matuā faamalieina lona faatinoga.
Ua tatau ai le viiga ma le faafetai tele e faafoi ma le loto faamaualalo i le Atua, auā o moemitiga ma moomooga o le tagata e mafai ona faamanuiaina pe a galue punouai ma le faamoemoe ma faatuatua i le Atua e maua mai ai le tali faamalieloto, pei ona sa faatāuaina ma molimauina e le paia ma le mamalu o faafeagaiga ma o latou faletua, o tamalii ma failauga, o tuaa ma mātua, o aiga aemaise nai fanau i lenei vaiaso i totonu o le Ekalesia Kerisiano AOG i Aukilani i le faaiuga o le vaiaso na se‘i mavae atu nei.
O le uluai faauuga lenei ua faataunuuina a le aoga a SAGNZ Bible College i Niu Sila ma e lua tausaga e aoga ai le sui i totonu o le laumua. Ua faaiuina nei aoaoga a le vasega muamua o le tausaga 2013 ma ua faamanuiaina ai i latou e to‘a 46 i le tusipasi Diploma in Ministry, o tina ma tamā, alii ma tamaitai talavou ua mafai ona ofoina atu lo latou soifua auauna e fai ma avefeau o le tala lelei.
Ua mae‘a nei la le tauiviga o le tusipasi tipiloma e pei ona faaeaina ai, a o lea ua tatala mai le avanoa mo tusi talosaga o le isi tusipasi maualuga o le tikeri o le Bachelor in Ministry and Theology.
O le polokaame a le kolisi faafaifeau lenei e uia lava foi auala ma aiaiga faale-Ekalesia, e tusa ma le soifua galue ma le soifua auauna o tagata lolotu. I lea lava faamoemoe na faasilasila aloaia ai foi se tusi faamaonia o le taliaina o le aoga faafaifeau e avea ma lala o le International Council for Higher Education ina ia maua ai ni avanoa mo ni vaegatupe e fesoasoani mo le faatupeina o ni vaega o le aoga, ma o se fiafiaga sili lea mo le pulega ma le komiti faafoe o le Kolisi. E tele foi nisi faailoga faapitoa na tauaaoina mo i latou na faamanuiaina i lea afiafi.
O le afiafi o le Aso Sa na faataunuuina ai le faapaiaina ma le faauuina o i latou ua faamanuiaina.
Na faatumulia le hall a le Samani Pulepule ia i latou na taupati mai e molimauina lenei fuafuaga tāua.
Sa mafai foi ona auai mai le susuga i le faifeau malolo manumalo, le susuga ia Samani Pulepule ma lona faletua aemaise o le auai mai o sui o le Ekalesia mai atunuu mamao ma sui mai Samoa na maualuga ai ma matagofie le faamoemoe, aemaise o le auai foi o le afioga i le faipule o Magele, susuga Su‘a William Sio.
O lea la ua nofo sauni nisi e talosaga mo le faaauauina o le isi faailoga e pei ona faailoa mai e amataina i le masina o Iuni ma faauuina faatasi ai le tausaga muamua i le tausaga 2014 i le alofa ma le agalelei o le Atua.
Mo le aufaauu uma o lenei tausaga, malo le tauivi, malo le taumafai, malo le faaea aiga malo foi le sogasogā mo le a‘otauina i le upu a le Atua.
Ia manuia tele outou laasaga uma ma faamoemoega o le lumanai, Malo lava!