O le finagalo o le Atua o le ta e lē agaia, o le ti‘a e lē maseua, o le mua e lē fuatia ma le tao e velo ile maninoa. O le Aso Tofi na faia ai sauniga faaleaiga o le afioga ia Nanai Tietie Seturo Nanai mai Falelatai, ae o le aso lava lea na faamanavaina ai galuega a le susuga ia Mata‘u Tusiga Reupena Felaga‘i mai Falelatai lava, o le puiaiga e tasi, ma ua ufitia ai ile ao pogisa lenei aiga i lenei masina e tasi. Amuia ē faanoanoa auā e faamafanafanaina i latou. Na faia sauniga faaleaiga o le susuga ia Mata‘u Tusiga Reupena Felaga‘i ile afiafi o le Aso Faraile ile malumalu o le Ekalesia a Iesu Keriso o le Aupaia o Aso e Gata ai i Brassall, ae o ona toe sauniga na faia ile aso ananafi ile malumalu lava lea ma molimoli atu i lona nofoaga mau ile fanua maliu i Wacol.
Na malaga mai ona tauaiga e aofia ona uso ma tuafāfine mai Amerika ma isi atunuu, na faatumulia e lē gata o le Uarota faapea aiga uo ma ē masani.
Na molimau le faletua ia Uila faapea le nofoaalo ile misia o le mafutaga mafanafana ma le tamā o le aiga i ona uiga faagalogata, o se tamā alofa ma tausaafia e tagata aemaise le galue malosi ile tausiga o le aiga. Na lologo le aofia ao faamatala e le faletua ia Uila le talaaga o le tamā ia Mata‘u ma le la mafutaga na amata mai Samoa, ina ua mae‘a lana galuega faafaifeau tala‘i ma tuufaatasia ai i laua ile faaipoipoga ile malumalu o le Ekalesia a Iesu Keriso o le Au Paia o Aso e Gata ai i Pesega ma malaga ane ai i Niu Sila ma agai mai ai i Ausetalia.
Na avea i laua o se Epikopo ile tele o tausaga ua mavae, ae le taulia ai e manatua foi ana galuega lelei na ia aumaia ai nisi mai Samoa e saili manuia i nei atunuu.
Na taualuga faamoemoega o le aso o le susuga ia Mata‘u Reupena, ma valaaulia ai le paia i ekalesia e fia, tauaiga ma uo, e auai ile taumafataga tele na tapenaina e le fale‘aiga a Lang Shu i Layard, le tofa ia Alofipo Vaea ma le faletua ia Janeta Lang Shu.
Amuia ē faanoanoa auā e faamafanafanaina i latou. Ia faamaise le Atua ile faletua ia Uila ma le nofoaalo faapea aiga uma o tagi mai ala.
