A mae‘a se galuega ma fausia se fale mo Ieova e ao pea ona sii a‘e le viiga ole Atua auā ana lē seanoa Ieova, e lē mafai ona faataunuuina le faamoemoe.
E lata ile lima tausaga o fuafua ma faagasolo vaega uma ole galuega ole malu, hall male tele o vaega eseese e iai potu ua lava tapena, mo tagata lotu, autalavou faapea alo ma fanau ale ekalesia Hosanna Brisbane Church lea oloo tumatila ma fausia ile pitonuu o Forest Lake.
Ose galuega tele male matagofie e mataina e tagata i taimi e laasia ai lea nofoaga pe a fuafua atu ile tau, ma ole loto lava na fai ai lenei galuega auā ana lē tasi loto, e lē tino mai ma mae‘a nei fale mole Atua ma lona fingalo. Ise faatalanoaga ma le susuga ile faafeagaiga ia Ps Asafo Avia o loo galuea ai ile ekalesia ma o ia foi ole taitai o ekalesia uma ale Hosanna Brisbane Church Network.
Ole tau atoa ole galuega ei le va ole 5 male 6 miliona tala, e 5 eka, 2,500 sikuea mita le telē ole fanua o iai le falesa male hall e tusa male 400 tagata lotu. E lata ile 250 matafale ole ekalesia e toatele lava i tagata Samoa, peitai, oloo fefiloi ma tagata mai isi atunuu eseese.
Ole saunoaga a lana auauna ia Ps Asafo Avia, na fai faafetaui uma fuafuaga ile faaulufaleina ole galuega ile Aso Toonai, ma ole afiafi ole Aso Faraile sa usuia ai le fonotaga ale Hossana Network mai isi lala ale Hosanna ile lalolagi atoa, lea na taitaia ele taitaifono Ps Asafo Avia.
Ole Aso Toonai 10 o Setema lea na tatalaina ai loa ma faaulufaleina le galuega ale ekalesia Hossana Brisbane Church i Forest Lake, lea na matuai pāpā tutu‘i le nofoaga fou ile mamalu ole atunuu na auai atu e molimauina le faamoemoe.
Ile mae‘a ai ole faamoemoe na toe tuufaatasia ai le tauaofiaga ale Hossana Network, sa auai uma le Samoan Pastors Network ma ole Susuga ia Ps Iliafi Esera sa saunoa ile upu faalaeiau.
Na matuai mafanafana lenei mafutaga a faifeau ma taitai faapea aiga ae sili ai le logo mālie o saunoaga faamalosi mai le Afioga mamana ale Atua.
Ole susuga ia Ps Asafo ose lupe faalele mai alalafaga o Salelologa ma Faleasiu faapea le faletua ia Hellen Avia e mai le afioaga o Luatuanuu ma Samusu Aleipata.
