O le Aso Tofi o le vaiaso ua tea na mae‘a ai galuega a le maota fono o le Palemene a Niu Sila ma pasia ai le faitauga lona tolu o le tulafono taufaaofi a le Malo e faatatau i le faapa‘ū o totogi e mafai ona totogi ai e pulega o kamupani ia tupulaga talavou o loo faafaigaluega. O le iuga o le palota i lea tulafono, e 61 faipule na palota i le ioe, e aofia ai le National, Act ma le United Future, ae 60 faipule mai vaega a le Labour, Green, NZ First, Maori, ma le vaega a le Mana na palota tetee i ai i lea tulafono.
O lea tulafono ua faataga ai pulega o kamupani ona totogi tupulaga talavou o loo faigaluega i se totogi e maualalo atu i lo le totogi maualalo faatapulaa faaletulafono, poo le minimum wage. O lona uiga e na o le 80% o le totogi maualalo faatapulaa faaletulafono (80% of the minimum wage) ua faataga ai pule o kamupani ona totogi ai tupulaga talavou i le va o le 16-19 tausaga le matutua.
Ua fai mai le Malo, o lea tulafono o le a mafai ai e kamupani ona totogi tupulaga talavou o loo faigaluega i se totogi maualalo, e amata ai seia mae‘a le 6 masina o faigaluega ona faatoa sii lea o latou totogi i le totogi maualalo faatapulaa faaletulafono poo le minimum wage o le $13.75 i le itula e pei ona iai nei.
Ua faapea mai foi le Malo o lea totogi maualalo o le a fesoasoani ai mo tupulaga talavou o loo fia saili ni galuega ae o loo faigata ona maua ni avanoa faigaluega e galulue ai. O le mau a le Malo e faapea, afai e maualalo le totogi o tupulaga talavou, o le a faapena ona faigofie i kamupani ona faaaogā latou e faigaluega, i lo le tagata matua, auā e taugata le totogi a le tagata matua, ae taugofie le totogi a le tagata talavou.
Na matuā tetee i ai vaega faaupufai uma o le Itu Agai ona o le faapa‘ū o totogi a le autalavou e afaina ai foi avanoa faigaluega mo tagata matutua. E lē gata i lea e lē o se mea lelei ona totogi o le aufaigaluega i ni totogi maualalo, a o lea ua mautinoa lelei o le totogi e tatau ona totogi ai tagata faigaluega ia mafai ona tausi lelei o latou aiga o le $18 i le itula poo le Living Wage lea.
O le isi o lea e aupito i sili lava le toatele o tagata e leai ni galuega ona ua tele o kamupani ua faaletonu, ma e foliga o loo nofonofo lava le Malo e lei ala i ni auala e maua ai nisi galuega mo tagata Niu Sila.
Sa ou fesiligia o‘u uso a faipule o le Pasefika, laua o loo iai i le Malo a le National, pe faapefea ona manuia ai tagata Pasefika i le faapa‘ū e le latou faigamalo o totogi a le aufaigaluega? E leai se tali.
E pei e foliga o loo mulimuli pogisa lava laua i mea o loo fai atu ai le alii Palemia, ae e lē o mafai ona tagai ane i le maualalo o totogi o lea ua faatagaina e le latou tulafono mo tupulaga talavou, aemaise le aufaigaluega a Niu Sila.
E lē o mafai foi ona tali mai le Malo pe fia le aofai o ni galuega o le a maua mai i lenei tulafono ua pasi, mo le 175,000 o tagata Niu Sila o lea ua resitala e leai ni galuega?
O loo manino lelei i le silafaga a le tatou Atunuu, ua toatele tagata ua leai ni galuega. O loo agai i lalo le pa‘ū o totogi a le aufaigaluega, ae o loo alualu pea i luga le siitia o le tau o le penisini taavale, le totogi o le eletise, ma le tele o tau o meataumafa.
Ua tatau lava ia Niu Sila atoa ona tuufesili pea le palemia o Niu Sila ma lana faigamalo pe faapefea le polomisi lea na fai mo Niu Sila atoa, ia maua uma e tagata Niu Sila se lumanai manuia – Mr Key promised a brighter future for all New Zealanders?
O se tasi lea o mataupu ua ou fofolaina i luma o tupulaga talavou na matou feiloai i le Aso Faraile ua tea, ina ia tali ai i le Malo poo talafeagai le totogi o le a totogi ai nei tupulaga talavou.
E toaiva tamaiti aoga na matou faatasi i le Aso Faraile ua tea i lo‘u Ofisa sa talosagaina a‘u e fia avea latou ma sui faipule a le autalavou mo Magele – Youth MP for Mangere.
Ona e tasi lava le faipule talavou e mafai ona ou filifilia o lea o le a fai ai se tauvaga lauga ma filifili ai e se komiti faapitoa se tasi e avea ma a‘u faipule talavou. E lē gata i lea o latou uma ua talosagaina o le a avea ma sui o le Palemene Fou mo le Autalavou i Magele, ina ia lagolago, unai ma faalauaitele mataupu mo tupulaga talavou.
O le afiafi o le Aso Tofi, aso 4 o Aperila i le maota o le Mangere Community Law Centre, i tafatafa o lo‘u Ofisa i le Mangere Town Centre, i le 5.30pm o le a fai ai lea tauvaga lauga ma filifili ai loa se tasi e avea ma Youth MP mo Magele.
Poo ai lava e fia auai i lea afiafi e manaia foi le tatou feiloai ma ave ai foi ni timaiga ma fautuaga i le autalavou o le a tauva mo lea tofi. O mātua uma, faapea uo ma ē masani e auai i lea po o le a mafai ona fai le latou palota poo ai se sui e tasi e fiafia i lana lauga, e fesoasoani ai i le galuega a le komiti faapitoa o le a nafa ma le filifiliga o se sui faipule talavou mo Magele.
E pei ona ou faamaninoina i tupulaga talavou na matou feiloai i le Aso Faraile ua tea, o le ala masani lea o le filifiliga o sui tauva mo le Leipa pe a saili ni sui e tauva mo faigapalota faalauaitele poo le palota mo faigamalo laiti e pei o le Auckland Council.
Ou te faamoemoe e tatou te faatasi ai pe a maua so outou avanoa.
