E ui ina lofia i loimata o le faavauvau ma le agaga nutimomoia, ae ao pea ona sii a‘e le faafetai i le Atua o mafutaga ma aiga, ona o tausaga e tele o la matou mafutaga ma le tina ma si a ma fanau.
O ia na foai, o ia foi na toe aveesea, e leai foi se loimata pa‘u e lilo i lana silafaga ati. Faafetai a‘e i le Atua ua amia le tina o le aiga ae ua iloa lona alofa i si a ma fanau ma nai a latou fanau, aemaise o sana tautua vaivai i lona finagalo i Ekalesia na auauna atu ai, faapea lona ola tausi aiga na fai ai o ia ma sootaga ma o ma aiga uma, uo ma aumea mamae.
Na soifua mai le afioga ia Tuitogama‘atoe i le aso 13 o Iulai 1950 i le afioaga o Lotofaga, ae ua amia e lona Matai i le aso 5 o Aukuso 2014 i Melepone Ausetalia. Na faaipoipo atu i le fetalaiga i le igoa matua ia Ale Sapakuka Seupule o Toamua, i le aai o Uelegitone Niu Sila i le tausaga e 1970.
E toasefulu o la alo (maliliu le toalua) ma a latou fanau e toasefulu ma le ono (16). E lona lima i le fanau e toasefulu ma le lua a le afioga ia Meleisea Si‘u. E valaau lona Matai o tautua i le Ekalesia a le Mount Zion AOG Church of Samoa i le pitonuu o Tarneit, lea o loo tausia e si ona alo tamaitai ia Aisa ma le faafeagaiga ia Tui Luamanu.
O lona sauniga faaleaiga (family service) i le afiafi o le Aso Lulu na mavae atu na faia i le malumalu o le AOG South West i Hoppers Crossing. Na maitauina ai le alofagia o le soifua o Lifa, e le gata i molimau fiafia o lona soifua tautua, ae o le tele o Ekalesia eseese na afifio atu aemaise o le paia lasilasi i le mamalu o tupu ma tamalii na faitaulaga faatasi i lea afiafi. Na molimauina foi le tofu sao o lupe faalele e fia a aiga na lua i lona sauniga.
O ona toe sauniga na lufilufiina e le faleono a le AOG Church of Samoa, na galulue sootauau ai le susuga i le taitai o Vitoria Ps Apouani Unasa ma faafeagaiga uma, ona molimoli atu ai lea i lona nofoaga mau i Altona, ma faaiu ai i lona peau faamavae i Sunshine West. Na tali ai le sua a le aufaigaluega paia ma taumamafa Samoa atoa na potopoto, ma faaalia ai valevale alofa o aiga na lua aemaise o le tamā ia Ale ma le fanau e ala i faaaloaloga faaleaganuu e masani ai.
O le fetalaiga ia Leugamata Faletolu Lofipo na tu tootoo auā le aso o le tina, ua moni ai e masani le tupu i ana aga faatupu ma le tamalii i ana aga faatamalii ona o faaaloaloga faatupu na tauaao i ai. O le fofoga o Tuuu Leato Tupuola na fai ma sui o Ekalesia ma Samoa e talifuaitau i le faaaloalo, vivii faatasi ai “Lota Nuu na ou fanau ai” faaiu ai i le tatalo ma ta‘ape fiafia ma le mama ua lomi. Manuia lau malaga Lifa!
