Na saunoa Jeff Lima i se talanoaga ma le Samoa Sportstar.com i Sini, ‘Ua malosi le Toa Samoa talu mai le taaloga ma Toga ia Aperila. I le mae‘a ai o ana taaloga ma le Kiwi ma Papua Niu Kini i le Ipu o le lalolagi o loo faagasolo, ua atagia ai foi le amata mautu o le malamalama o le isi tama i le isi tama auā ua atoa nei le ono vaiaso talu na mafuta le Toa Samoa i totonu o Peretania.
“Ou te talitonu o le a faatupulaia le malosi o le Toa auā o le taaloga lava ma silafia itu lelei ma itu e ono toe tapenapena atili,” saunoa i ai Jeff Lima i Merrylands, Sini. “O le isi itu o loo faamalosi ai tama o le au o le tapuaiga a aiga ma le atunuu.”
Na fesiligia le susuga Jeff i lona manu‘aga ua lē mafai ai ona taalo i le Ipu o le lalolagi. “Ia o lea ua sologa lelei lava togafitiga ma ua sui foi mai le tulaga tugā na iai ae o loo mafanafana lava le agaga e mafai e nai uso ona ausia se tulaga lelei mo Samoa i le Ipu o loo faagasolo.”
Sa fesiligia foi Lima i se auala e ono faafetaui ai au malolosi e pei o Egelani, Ausetalia ma Niu Sila pe a toe feiloai i le tauvaga pa‘ū ma nofo?
“Ou te talitonu ma ua silafia foi e si a tatou ‘au le auala e taaalo ai ma nei ‘au, o le tuu lava i ai o a tatou faataumoa e pei o David Faalogo, Tony Puletua, Mose Masoe ma Suaia Matagi i le ogatotonu o le puipui mai a Egelani, Ausetalia ma Niu Sila.”
O le toe auina atu o Tony Puletua ua talafeagai e sui tulaga ia Reni Maitua, Frank Winterstein ma Harrison Hansen ua manunu‘a uma.
Afai e manumalo Samoa i lana taaloga mulimuli o le pulu ma Farani o le fetaui Samoa ma Fiti i le kuatafaino ae afai e faia‘ina Samoa, o le a taaalo ma Egelani i le isi kuatafaino.
O Toga ua muta lo latou taumafai ma pe malo pe faiaina i lana taaloga faaiu ma Italia i lana pulu e lē sao lava i le valu pito i luga.
Na momoli ai foi le faamalo a Jeff Lima i le faiaoga lagolago a le Toa Samoa ia Ponifasio Vasa o loo lagolago ia Matt Parish mo tapenaga tāua a le Toa Samoa.
