Ua tapena atu nei Ekalesia e fitu i Kuiniselani mo le tauvaga pese faaleagaga o viiga o le Atua. O lenei tauvaga pese o se poloketi poo galuega faataotooto a le leito i Perisepeni i totonu o le tailua tausaga ma faatino.
O le agava ma le tofāmamao, le Viiga o le Atua e maualuga pea ma o se auala e tuufaatasia ai Ekalesia eseese ae lē gata i lea o se mafutaga a le fanau a Keriso ae o se fealofaniga foi lea o tagata Samoa i totonu o Kuiniselani nei.
O Ekalesia nei o le a tauva i lenei tauvaga, e aofia ai le Ekalesia Evagelia Uesiliana Metotisi i le itu i Matu, Ekalesia Aso Fitu o le Toe Afio mai Koneferenisi i Deception Bay,faapea matagaluega e tolu a le Faasinoti, ekalesia Metotisi a Logan City, Ekalesia Metotisi a Camira, Ekalesia Metotisi a Browns Plains, EFKS a Logan City, ma le Ekalesia EFKS Southwest Brisbane. E iu e lē faigofie lona faataotoga o nei poloketi ae leai se mea e faigata i le Atua. Ua faafaigofie mea uma i le Suafa o le Alii faatasi ma le lagolago o le au faipisinisi aemaise le atunuu.
Ua iai le faamoemoe e tolu faamasino o lenei tauvaga e lē o ni faamasino i totonu lava o Perisepeni nei. Ua mafai foi ona auai mai i ai nisi o alo talenia o le atunuu e lagolago le po. O le a taumafai foi ina ia maimoa i ai lo tatou atunuu i lenei faamoemoe pe a mae‘a.
O le faailoga muamua siamupini $3,000 ma le ipu; (2) $2,000 ma le ipu; (3) $1,000 ma le ipu; (4) $700 ma le ipu; (5) $600 ma le ipu; (6) $500 ma le ipu; (7) $400 ma le ipu e faapea foi le fuataimi mataalia i lana galuega, ae sili ai foi ma le tapiano atoatoa lelei i le faatinoina o ona faiva. Ua iai le faamoemoe o tagata uma lava o le a auai, o le a ulufale i le $5.00. O loo talosagaina le mamalu o le atunuu i Kuiniselani ina ia aua ne‘i misia lenei avanoa e faafofoga ai i aufaipese logo mālie ae o se avanoa foi e mafuta ai i lea afiafi.
O le a taumafai foi le Uncle Sam’s Take Away ma le Penina o Asuisui auā sina taumafataga ma se vai mālū mo le atunuu auā le afifio ma le susū mai i le tauvaga pese.
Ua iai nei le faanaunauga o polokalame uma o le po o le a alu sa‘o uma lava i le ea auā le faafofoga a le atunuu e lē gata o Kuiniselani a o ona nuu tuaoi ma ana uo ma paaga.
O le a pueina uma lava e le leitio auā le DVD mo le faatauina atu lea i Ekalesia uma ma tagata lautele.
