E le faigofie ona faataatia se poloketi ma se fuafuaga o se auaunaga poo se tautua aua le atunuu.
E ifo mauga a‘e vanu, e felefele foi mafaufauga poo gafea e amata mai ai ae o a foi taualumaga uma ma gaioiga e ono taunuu ai lenei musumusuga lilo.
O le taeao segisegi o le Aso Toonai, 21 Aperila, na tatala aloaia ai le tautua ua faaigoaina o le Nape’s Pacific Flavours Take-Away, i le nofoaga o Cresmead i le tuatusi: Shop 8 numela 5/211 Julie Street, Cresmead, QLD.
O le pulega o lea foi auaunaga o le afioga ia Mauala‘ivao Tusitala ma le faletua ia Faanape Timoteo, o ia lea o le tamaitai pule.
O le Aao tusitusi o le Faasinoti Ekalesia Metotisi Susuga ia Rev Ioane Tuupo, o ia sa taitaia le sauniga lotu, o ia foi o le Tausi Matagaluega a Logan City. Na faatumulia i nisi o malo faaaloalogia faapea le lagolagosua a aiga na lua.
O le afioga ia Mauala‘ivao Tusitala e mai le alalafaga o Malie, Eva Salelesi ma Tufutafoe ae o le tamaitai pule ia Nape o se alo e faasino i le Toeaina ia Afoa Alapati ma Sarai Meatuaituuga Stevenson, o se tuafafine foi o le susuga ia Alofa lea sa lauiloa ai le faaili a le Five Stars e pei ona lausilafia (Laulii ma Safune).
O loo mafai ona fesoasoani le nofoaalo ma le aiga i le tau amataina o le tautua a le Nape’s Pacific Flavours Take-Away.
O nisi foi e tupuga mai i tagata iloga i tulaga tau pisinisi ma tautua e pei ona iai foi le tautua a le afioga ia Galumalemana Naea Harry Timoteo ma le aiga e ala i faleoloa ma containers. Sa tofoina e le auvalaaulia le tele o taumafa ma na faamalieina le galala i le matagofie ma le felanulanuai o taumafa.
O faalifu talo ma talo tao, sapasui, falai flounders, povi masima, stirfry, palusami ma le kama filemu o mamoe ae siva mai i le marinated source, ia ua uma la ma ifi le toonai o le Aso Sa.
E fiafia foi le tamaitai pule ia Nape ma le afioga ia Mauala‘ivao Tusitala Timoteo ma le nofoaalo e molimoli atu alofaaga ma le agaga faafetai ia i latou uma na auai atu i le aso faapitoa o le tatalaina o le latou fale‘aiga.
E mafai ona maua atili nisi faamatalaga i lenei auaunaga fou pe a fesootai i numera nei a le Nape’s Pacific Flavours Take-Away: 0467 635 722 poo le 0407 378 212.
