O se Kerisimasi faanoanoa i aiga ma fanau aemaise o uo ma ē masani a nisi o tamalii se toatolu sa galulue ma tautua i le Matagaluega o Leoleo ma Falepuipui i tausaga ua mavae, ua valaau i ai lo tatou Matai.
O le vaitau lenei o le ōliōli atu o le lalolagi i aso fiafia ae ua faafuasei ona motusia ai le mafutaga ma nei tamalii sa matuā tele lo latou sao i le tautuaina o le Malo e ala i le matagaluega o leoleo ma falepuipui.
O le afioga Lilomaiava Suemalo Ilai Fou Taioalo na tuumalo faafuasei i se gasegase i le Aso Lua ua mavae. O se gasegase na mafua ai ona tuumalo faafuasei o ia e pei ona faaalia e se tasi o ona atalii e galue foi o se leoleo o le Malo.
O se tasi o tamalii o le tofa Manu Fala‘ula sa umia le tulaga o se leoleo asiasi a o lei siitia atu ma faauluulu i ai le vaega o le fuimu a o tuufaatasia le Matagaluega o leoleo ma falepuipui ma le fuimu i tausaga ua tuanai. Sa faauluulu i ai le auaunaga a le fuimu seia oo ina malolo litaea.
O le afioga Ga‘ono Jack Schmidt e silafia e le atunuu a o tautua faaleoleo i le tele o tiute sa ia tauaveina aemaise o vaega eseese o le matagaluega sa tautua ai. O se tasi o leoleo sinia i le taimi o avea le afioga Asi Semisi Blakelock ma Komesina sa filifilia e fai ma fofoga o le Matagaluega i le va i fafo poo se public relations officer ina ua malolo litaea. O se tautua sa ia faatino mo ni tausaga seia oo ina mapu i lona aiga mo nisi o fuafuaga ina ua ia tuua le matagaluega o leoleo ma falepuipui.
O nei tamalii e toatolu e lē tau faailoaina lo latou sao i le atunuu i le galuega faaleoleo auā e tele tausaga o galulue ai. O ni tamalii foi sa lotolotoi i galuega ma fuafuaga a le Malo sa manaomia ai le sao o le auaunaga faaleoleo.
O le vaiaso nei o loo faia ai toe sauniga o le afioga Lilomaiava Fou Taioalo i Papaloloa, o le afioga Ga‘ono Jack Schmidt i lona aiga i Vaimoso ma le tofa poo le fetalaiga a Manu Fala‘ula i lona aiga i Salelesi.
Ia avea le afio mai o le pepe o le Kerisimasi e fai ma feau faamafanafana mo aiga ma fanau aemaise o uo ma aumea mamae ma ē masani i le valaau paia a le Atua ua ufitia ai i le ao pogisa a o lumanai le Kerisimasi o lenei tausaga 2015. Ia maua so latou nofoaga mau i le lagi. Le auauna lelei e, ma le faamaoni ulufale maia i le fiafia o lou Alii!
