O le vaitau o le tau totogo o laau, ae tautotogo ai foi ma le mafana o mafutaga tuufaatasia ma avea ma tino e tasi. O le aoauli o le Aso Faraile sa tuufaatasia ai e ala i le faaipoipoga le afioga ia Taefu James Sofeni ma lana manamea o Cecilia Pauline Faustina Petelo.
Sa taitaia lava le sauniga e le afioga ia Patele Epati Tamati o le taitai o le puleaga Katoliko a Kuiniselani. O timaiga mo le ulugalii fou, sa faatāuaina ai ia moni le alofa, e lē losilosi le alofa, e lē mitavale, e faamaoni e lē gaoiā ma lē fefe foi le alofa.
Sa lagiina pese o le Misasa e le faaili lauiloa mai Niu Sila o le Punialavaa, le susuga i le faafeagaiga ia Lale & faletua ia Vini & nofoaalo aemaise le aufaaili, ma o le autu foi lea ole malaga mai ona o se tasi o sui o le aufaaili ia Vaasilifiti Vitale Petelo e faasino tonu i ai le alo tamaitai sa faaipoipo.
O mātua o le alii faaipoipo, o Lealofi Lealaitagomoa Lausei (Falelatai, Vaigaga & Taga) ma le tina ia Lagi Pritchard (Tiavea Aleipata). O mātua o le tamaitai faaipoipo o lona tamā o Vaasilifiti Vitale Petelo (Leauvaa & Fusi Safotulafai) ma le tina ia Levine Petelo (Tuvalu). O le afioga ia Muliagatele Filipina Petelo sa fai ma Fofoga o le faamoemoe.
O le tofa ia Patea Pesamino Taefu sa feagai ma faaaloaloga, fai ma sui o aiganalua. O le sui Katoliko i Marden, le afioga ia Nanai Ulusele sa fai ma sui o le auvalaaulia e faafetaia aiganalua ona o le taumafataga ma faaaloaloga.
E tele ausiva matagofie sa faafiafia ae sili ai ona nanau loto ma finagalo i fatuga mālie a le faaili logologoā a le Punialavaa, le susuga i le faafeagaiga ia Rev Lale & Vini Peteru ma le aufaaili. Manuia le aiga fou!
