Tuufaatasia Chesed Punialavaa Lale Peteru ma Kelcey Ioane Saminatoto i le faaipoipoga

Na molimauina e aiga na lua, uo ma ē masani le tuufaatasia o le aiga fou o Chesed Punialavaa Lale Peteru ma lana manamea o Kelcey Ioane Saminatoto e ala i le sakalameta o le faaipoipoga, i le Aso Toonai o le faaiuga o le vaiaso.
Na faatumulia le falelotu o le ekalesia EFKS New Vision i Magele i le taimi o le sauniga faapea ma le ‘aiga na faia lava i tua ane o le Ngā Tapuwae Hall i le nofoaga e tasi i Magele.
O Chesed Punialavaa o se alo alii faasino i le Susuga i le faafeagaiga taulagi Rev. Lale ma Vini Peteru, o le Ekalesia EFKS New Vision i Magele, aemaise o le aufaipese a le Punialavaa e pei ona lauiloa ai, mai afioaga o Vailele ma Saleimoa i Samoa. O Kelcey o le tamaitai Faalealili ma Vaisala i Savaii, o se alo faasino foi i le Afioga Tau‘o Saminatoto ma le faletua ia Milovale Ioane.
O moemitiga nei o soo se matua, ia tini lau o le faamoemoe a fanau, e lē gata i aoaoga, o galuega ma ia maua se faaipoipoga ma se aiga lelei. Peitai lea ua tino mai le faamoemoe, faapaiaina ma tuufaatasia Chesed ma Kelcey i luma o le Atua.
E maeu foi le matagofie o sauniuniga ma tapenaga o le aso fiafia o le ulugalii fou, ua na o foliga lava o le fiafia ma le loto e tasi na maitauina i lea aso.
Toatele foi nai o la aiga na malaga mamao mai, o nai aiga mai Samoa, auā lava le fia molimauina o le aso fiafia o le fanau.
E na o le toalua le la laina, o le uo sili ma le aumea mamae e toatasi, faatasi ai ma tamaitai ave teu fugalaau e toalua. O le uosili a le tamaitai o Litia Saminatoto Ioane ma Aiga Saminatoto Ioane o le tamaitai aumea mamae, Melody Lale Peteru ma Kalani Ai‘i o flower girls. O le uosili a le tama, Nanai Viellani Lale Peteru ma Cliff Bunyali. O le aufaipese a le  Punialavaa na faafiafia ma tata i le taimi o le sauniga lotu faapea ai ma le ‘aiga, auā o le susuga i le alii faaipoipo, o se tasi o sui leo lelei o le aufaipese.
Momoli atu ai ma faamanuia mo le aso fiafia o le ulugalii fou, ia manuia tele le aiga fou, faavae i le alofa mai le Atua ma ia fua tele le niu Chesed Punialavaa Lale Peteru ma Kelcey Ioane Saminatoto.