Na te‘i lava ua ave faatopetope se tamā e tusa e i le va o le 55 i le 65 tausaga le matua i le Ofisa o Leoleo i le amataga o le vaiaso na tea nei. O le mafuaaga na maua mulimuli ane ina ua suesue le mataupu ona ua lē faaaloalo i le taimi na sisi ai le tagavai o le atunuu i luma ane o le Maota o le Malo i le Eleele Fou.
Ona pau lava le tulaga na matauina atu ina ua ave si toeaina i tua o le taavale a Leoleo o le la na tauupu mai le tamā lea ma se alii leoleo e suafa ia Mose. O le mea na tupu o le ta o le iva na amata aloaia ai le sauniga lenei e faia i taeao taitasi.
O le taunuu mai lava o le foleni a Leoleo i luma o le Maota o le Malo, sisi loa le tagavai o le atunuu. E taofi uma lava la gaioiga i lea nofoaga o le taulaga ona o le faaaloalo lea i le sisiina o le fu‘a.
O le toeaina lenei ua lē māua lona suafa, sa faapea ona nofonofo i se tasi o fale faatali pasi i autafa lava o le auala tele. Sa faapea ona matamata lelei lava le tamā lea i le foleni a Leoleo ma e amata lava le sisiina o le tagavai o le la e nofonofo lava si toeaina.
Sa iai papalagi na feoai solo e tapue ata o lea foi vaaiga masani. E lei ano lava i ai leoleo na faapea ona i lea nofoaga ma leoleoa le feoai a taavale ia ua tutū uma ma o nisi ua feosofi i fafo o taavale ae tulai faaaloalo i lea taimi.
Na ona o ese lava o papalagi, savali ane loa le alii leoleo lea e suafa ia Mose ma e vaai atu ua fekolafa‘i solo le toeaina ma na lagona atu le otegia o le toeaina i le lē tulai faaaloalo e pei o le toatele sa i lea nofoaga o le taulaga.
O le toeaina e manino lava le te‘i ma e foliga mai e lē o malamalama si toeaina i tulafono e pei ona faamamalu ai lenei foi sauniga tāua i taeao taitasi.
O le tala a le toeaina, “Ou te lē iloa e tatau ona ou tu i luga, ae aisea na e lē taofia ai la papalagi ia na feoai ane i ou luma – O lona uiga e te lē iloa nanu i ai a? ae o lea ua soona fai fua tagata,” e fai lava tala a si tamā lea ma taumafai e soso ese mai i le Leoleo.
Na lau loa e le Leoleo le lē faaaloalo ma le fiapoto o le toeaina. E foliga mai ua ita le Leoleo ina ua lalau atu le lē iloa nanu i Papalagi auā ua taliē tagata ia e i totonu o taavale ma fafo i le faamatalaga a le toeaina.
E lei toe faatali loa le leoleo ae taitai sa‘o lava si toeaina i le taavale a Leoleo na faapea ona iai i lea nofoaga ma ave loa.
Na taumafai le tatou Ofisa e sailiili pe faamata ua molia si toeaina, peitai e lei maua ona e leai se suafa na maua e le tusitala se‘i vaganā ai le alii leoleo e suafa ia Mose.
Sa tuu le avanoa e saili ai pe ua faia se moliaga faasaga i le tamā ae e mae‘a lelei lava foi lea aso e leai se lipoti ua toe foi mai.
O le vaega lea o sauniga ua ave i ai le faatāua a le atunuu e iai tulafono ae e toatele lava le mamalu o Samoa e lē malamalama tele i ai.
O le taimi lava e tāina ai le fu‘a o Samoa o lalo o le Tulafono e tatau ona taofi feoaiga a soo se taavale ma e taofia lava la e Leoleo e tiute i luga o alatele lea tulaga. E leai se taavale e toe fealuai ma o le tuutuuga lava ia o le Tulafono, e tatau ona agai ese tagata o i totonu o taavale ae tulai e lē minoi i le taimi e sisi ai le fu‘a o le atunuu.
E lē faamalosia le o i fafo o tagata mai ia latou taavale ae e moomia le nonofo lelei i totonu e aunoa ma se pisapisao.
O isi la tagata o loo i fafo i lalo o fale poo luma o le Maota o le Malo i lalo o pulu e iai aiaiga na e tatau ai ona tutu lalai lelei ma faaaloalogia lea sauniga.
Sa tatau lava ona faamalamalama i si toeaina auā e sa‘o ai sa tatau lava ona musumusu i papalagi e aua le feoai i le taimi e sisi ai le fu‘a ae e leai lava se leoleo e fai i ai ae ua vave lava le faasinosinolima i si toeaina lenei e saofai e lē o minoi solo foi ae ua na ona matamata lava i lea sauniga o loo faatautaia e Leoleo.
Afai ua molia si toeaina lea o lona uiga o ia le tasi o tagata muamua o le a molia i le lē faaaloalogia o le sisiina o le fu‘a o Samoa.
