O loo faagasolo le talanoaina o le tala autū o le Tupe i lona faasoasoaina mo le isi tausaga faaletupe lea e amata i le masina o Iulai. O le tala autū o le tupe lenei, e fesoasoani mai ai Malo e pei o Niu Sila, Ausetalia, Iapani, le Iuni a Europa ma isi paaga a Samoa i atunuu tetele i fafo.
O le latou fesoasoani atoa e $22 miliona (tala Samoa). E ese mai la i le fesoasoani aloaia ua faalauiloa i totonu o le tala autū o le Tupe, o loo iai foi nisi o faalapotopotoga tuma‘oti ua tutu faatasi nei auā le ofo atu o le latou foi fesoasoani i nisi o aiga na matuā afatia i le afa o Eveni.
O le polokalame o atinae ma fesoasoani a le Ekalesia Aso Fitu o le toe afio mai, le ADRA, o le faalapotopotoga o fesoasoani mo tagata lautele a le Iuni a Europa lea e ta‘ua o le ECHO ua galulue uma ma le Tali o faalavelave faafuasei le DMO i Samoa nei, o le faalapotopotoga o fesoasoani faavaomalo le OXFAM auā galuega toe faaleleia i le atu Safata faapea Siumu ma Fagaloa.
E silia i le 100 fale ua faaleagaina maota ma laoa i itumalo e tolu ona o le afā ma o le fesoasoani na tauaao atu i le Aso Faraile na tea nei na aofia ai mea faufale ma meafaigaluega auā le atina a‘e ai o faatoaga i nofoaga nei ua faaleagaina.
O ni asiasiga na faatautaia e faalapotopotoga e ta‘ua o le ADRA ma le OXFAM na filifili mai ai loa ma aiga ua manatu ia faalapotopotoga e tatau ona ave i ai le fesoasoani i lalo o lenei polokalame.
Faaalia e le tamaitai Faatonu o le faalapotopotoga a le ADRA, le Afioga Su‘a Julia Wallwork, o i latou ia ua taulai i ai lenei fesoasoani o aiga e lē o iai se tagata faigaluega e mafai ona maua mai ai ni nonogatupe e pei ona faatino ai fesoasoani ua faalauiloa e le Malo. O le itu tau i le faaleleia o maota ma laoa i le polokalame lenei ua sau ai le tupe mai i le Oxfam i Niu Sila, le ADRA i Siamani, o le Vaega o fesoasoani e aunoa ma se totogi a Niu Sila le NZ VSA ma le aoga o matata eseese a Ausetalia le APTC.
O loo tutu faatasi uma nei faalapotopotoga ma le vaega lea o le DMO poo tali o Faalavelave Faafuasei i Samoa, le Matagaluega o Galuega tetele a le Malo, le Matagaluega o Mataupu tau Tina ma Tamaitai, Atina‘e o Nuu ma Aga Fesootai, faapea le faalapotopotoga o Maota mo tagata Soifua le Habitat for Humanity.
O le itu i le faaleleia o taumafa maua lea ua iai le fesoasoani lea a le Iuni a Europa e ta‘ua o le ECHO, o le Matagaluega o Faatoaga ma Faigafaiva ma le Faalapotopotoga o taumafa ma faatoaga a Malo Aufaatasi lea e ta‘ua o le FAO. O lea ua galulue ia faalapotopotoga i le amata ai o atina‘e tau faatoaga aemaise o togalaau fai sua ma togalaau‘aina i aiga uma ia ua aafia ma ua toe fausia o latou fale e le vaega muamua o lea fesoasoani.
O le vaega lona tolu o le fesoasoani lenei ua faamautu ai le iai o meafale moomia, e pei o tainamu, o fesoasoani muamua, o ipu ma totoga o umukuka mo le gasesega o taumafa, o ogaumu sima ua mafai ona fuafua le fausia mo aiga nei atoa ai nisi o meaafale, ma o le faamoemoe ina mautu uma nei manaoga i aiga ia o le a fausia o latou fale ma amata a latou fa’atoaga.
E moni ai le upu o le tele o lima o le māmā foi lea o se galuega ma ua faafetaia e le ADRA Samoa le tulai mai o faalapotopotoga ma matagaluega a le Malo i lenei taumafaiga ina ia mautinoa e malupuipuia soifua o tagata na aafia ona o le afā o Eveni i le tausaga na tea nei.
